Ուկրաինան պաշտպանական-արդյունաբերական ոլորտում համագործակցության հուշագրեր է ստորագրել ԱՄՆ մի քանի մասնագիտացված կազմակերպությունների հետ։ Այս մասին հայտնել է նախագահ Վլադիմիր Զելենսկու մամուլի ծառայությունը։
Նշվել է, որ Զելենսկու ներկայությամբ «Ուկրաինայի ռազմավարական արդյունաբերության նախարարության, Գլոբալ պաշտպանական արդյունաբերական դաշինքի, Արիզոնայի պաշտպանական արդյունաբերական կոալիցիայի և Յուտայի օդատիեզերական և պաշտպանության ասոցիացիայի միջև ստորագրվել են համագործակցության և համատեղ նախագծերի զարգացման հուշագրեր»։
Ինչպես նշվում է մամուլի ծառայությունում, ակնկալվում է, որ այն կնպաստի «ուկրաինական կողմի և ամերիկյան պաշտպանական ընկերությունների միջև կապերի հաստատմանը և համագործակցության զարգացմանը, որոնք հետաքրքրված են Ուկրաինայի տարածքում իրենց արտադրական օբյեկտները տեղակայելու հարցում»։
Սեպտեմբերի 21-ին Զելենսկին հանդիպել է ԱՄՆ պաշտպանության նախարար Լլոյդ Օսթինի հետ և քննարկել Ուկրաինային «Ռամշտեյն ձևաչափով» ռազմական օգնության կոնտակտային խմբի հանդիպման արդյունքները և երկարաժամկետ հեռանկարում Կիևի պաշտպանական կարիքները։ Դրանից հետո նախագահը ժամանել է Սպիտակ տուն՝ հանդիպելու իր ամերիկացի գործընկեր Ջո Բայդենի հետ։
