Լեռնային Ղարաբաղի նկատմամբ ադրբեջանական վերջին ցեղասպանական ագրեսիայի հարցի շուրջ հրավիրված ՄԱԿ-ի Անվտանգության խորհրդի արտահերթ նիստին Թուրքիան ներկայացված էր ԱԳՆ փոխնախարար Բուրակ Աքչապարի մակարդակով։
Թուրքիայի ներկայացուցիչը ՄԱԿ-ի ԱԽ հարթակն օգտագործեց հերթական անգամ Հայաստանի հասցեին անհեթեթ մեղադրանքներ հնչեցնելու և եղբայրական Ադրբեջանին հանգամանքների զոհ ներկայացնելու համար։
Աքչապարը ամբողջությամբ արդարացրեց Ադրբեջանի ցեղասպան գործողությունները՝ դրանք անվանելով «հակաահաբեկչական» և երկրորդելով վերջիններիս անհիմն փաստարկները, օրինակ՝ Արցախի օկուպացված տարածքներում ադրբեջանցիների՝ ականների վրա պայթելու մեջ մեղադրելով հայկական կողմին։
Թուրքիայի արտաքին գերատեսչության ներկայացուցիչը նաև առիթը բաց չթողեց Հայաստանին մեղադրելու 2020 թվականի նոյեմբերի 9-ի հայտարարության դրույթները չկատարելու մեջ։
Աքչապարը «հաջողացրեց» նաև Արցախի հարցով նիստին կրկնել «Զանգեզուրի միջանցքի» մասին թեզը՝ մեջբերելով Թուրքիայի նախագահի՝ ՄԱԿ-ի գլխավոր ասամբլեայի նստաշրջանում հնչեցրած ելույթից մի հատված։ «Հույս ունենք, որ Հայաստանը կկատարի իր խոստումները, հատկապես Զանգեզուրի միջանցքի բացումը»,- ասել էր Էրդողանը։
