Լեհաստանի և Ուկրաինայի միջև հացահատիկի ներկրման շուրջ տարաձայնություններն էական ազդեցություն չեն ունենա երկրների միջև լավ երկկողմ հարաբերությունների վրա, հայտարարել է Լեհաստանի նախագահ Անջեյ Դուդան՝ փորձելով թուլացնել լարվածությունն այդ հարցում, փոխանցում է Reuters-ը։
Անցյալ շաբաթ Լեհաստանը որոշեց երկարաձգել ուկրաինական հացահատիկի ներկրման արգելքը՝ առաջացնելով Կիևի զայրույթը։
«Ես կասկած չունեմ, որ Ուկրաինայից լեհական շուկա հացահատիկի մատակարարման շուրջ վեճը լեհ-ուկրաինական հարաբերությունների դրվագ է», - ասել է նախագահ Անջեյ Դուդան՝ գործարար համաժողովի ժամանակ: «Ես չեմ հավատում, որ սա էական ազդեցություն կունենա դրանց վրա, ուստի մենք պետք է լուծենք այս հարցը մեր միջև»:
Սլովակիան, Լեհաստանը և Հունգարիան ազգային սահմանափակումներ են մտցրել ուկրաինական հացահատիկի ներմուծման վրա այն բանից հետո, երբ ԵՀ-ն որոշել է չտարածել ներմուծման արգելքն այդ երկրներ և բլոկի մյուս անդամներ՝ Բուլղարիա և Ռումինիա:
Այս երկրները պնդում են, որ ուկրաինական էժան գյուղատնտեսական ապրանքները, որոնք նախատեսված են հիմնականում դեպի արևմուտք և նավահանգիստներ տարանցման համար, վաճառվում են տեղում՝ վնասելով սեփական ֆերմերներին:
Նախագահ Վլադիմիր Զելենսկին զայրացրել է իր հարևաններին, երբ նա ՄԱԿ-ի Գլխավոր ասամբլեայում ասել է, որ Կիևն աշխատում է հացահատիկի արտահանման համար ցամաքային ուղիները պահպանելու ուղղությամբ, սակայն հացահատիկի ներկրման շուրջ «քաղաքական թատրոնը» միայն օգնում է Մոսկվային։
Սպասվում էր, որ Դուդան Նյու Յորքում կհանդիպի Զելենսկիի հետ, սակայն նման հանդիպում չի կայացել։ Հինգշաբթի TVN24 մասնավոր հեռուստաընկերությանը տված հարցազրույցում հարցին ի պատասխան՝ նա ասաց, որ «մթնոլորտը լարվել է», և ինքը դառնացել է՝ լսելով Զելենսկիի խոսքերը։
Սակայն, նա նաև ասաց, որ «իհարկե» նրանք դեռ ընկերներ են, և ինքը հույս ունի, որ, հնարավորության դեպքում, դեմ առ դեմ կզրուցի Զելենսկիի հետ։
