Քիչ առաջ Գորիսից Արցախ տանող մայրուղով ռուս խաղաղապահների շուրջ 15 բեռնատարներից կազմված ավտոշարասյունն անցավ Հայաստանից դեպի Արցախ: Ռուսաստանի դրոշներով բեռնատարների տեղաշարժը ֆիքսել է AFP–ի տեսախցիկը:
Նշենք, որ սա արդեն ռուսական բեռնատարների երկրորդ շարասյունն է, որն այսօր Լաչինի միջանցքով մտնում է Արցախ: Ավելի վաղ էլ «Ռոյթերսն» իր թղթակցին հղում տալով հաղորդել էր, որ 7 ռուս խաղաղապահների բեռնատար Գորիս-Ստեփանակերտ ճանապարհով ուղևորվել է Արցախ:
Առայժմ հայտնի չէ, թե ինչ կա բեռնատարներում:
NEWS.am-ի հետ զրույցում Արցախում հումանիտար ճգնաժամի կառավարման աշխատանքային խմբի ներկայացուցիչ Վարդան Սարգսյանը հայտնեց, որ իրենք որևէ տեղեկատվություն դրա մասին չունեն. «Հայկական բեռնատարների շարժի մասին որևէ տեղեկատվություն չկա: Ռուսական բեռնատարների մասով չեմ կարող մեկնաբանել, որովհետև դա աշխատանքային խմբի և Հայաստանի կառավարության կողմից ուղարկվող ուղեբեռի հետ առնչություն չունի»:
