Եվրահանձնաժողովի (ԵՀ) նախագահ Ուրսուլա ֆոն դեր Լյայենը The Washington Post-ին տված հարցազրույցում ասել է, որ  ԵՀ-ի ղեկավարի պաշտոնում կրկին առաջադրվելու որոշումը կկայացնի այս տարվա վերջին։

Այն ասեկոսեների վերաբերյալ, որ ֆոն դեր Լյայենը կարող է դառնալ ՆԱՏՕ-ի հաջորդ գլխավոր քարտուղարը, պարբերականի  թղթակիցը  հարցրել է, թե ո”ր աշխատանքն է նա նախընտրում՝ Եվրահանձնաժողովո”ւմ, թե” ՆԱՏՕ-ում։

«Ես ծնվել եմ Եվրոպայում: Տան իմ առաջին զգացողությունը կապված է Եվրոպայի հետ, և կարծում եմ, որ այն որոշակիորեն դրոշմված է իմ հիշողության մեջ, քանի որ ծնողներս կրքոտ եվրոպացիներ են եղել»,- ասել է  ԵՀ նախագահը։

Ավելի վաղ The Telegraph-ը, հղում անելով իր աղբյուրներին, հայտնել էր, որ Բայդենը պնդում է ՆԱՏՕ-ի գլխավոր քարտուղարի պաշտոնում հատկապես ֆոն դեր Լլայենի նշանակումը։

ՆԱՏՕ-ի ղեկավարներն այս ամառ չկարողացան համաձայնության գալ ՆԱՏՕ-ի ներկայիս գլխավոր քարտուղար Յենս Ստոլտենբերգի իրավահաջորդի վերաբերյալ: Ուստի, դաշնակիցները պայմանավորվեցին մեկ տարով երկարաձգել Ստոլտենբերգի պաշտոնավարման ժամկետը․ նա կգլխավորի Հյուսիսատլանտյան դաշինքը մինչև 2024 թվականի աշուն։ Հենց 2024 թվականին էլ կլրանա Եվրահանձնաժողովի ներկայիս կազմի մանդատը։