2024 թվականին Ռուսաստանի իշխանությունները մտադիր են պաշտպանության ոլորտում բյուջետային ծախսերը ՀՆԱ-ի ներկայիս 3,9%-ից հասցնել 6%-ի, հայտնում է Bloomberg-ը, որը ծանոթացել է բյուջեի պլանների նախագծին։

Բացարձակ թվով պաշտպանական ծախսերը 6,4 տրիլիոն ռուբլուց կհասնեն 10,8 տրիլիոն ռուբլու։ Bloomberg-ը հիշեցնում է, որ նախապատերազմյան 2021 թվականին պաշտպանության ծախսերը կազմել են 3,6 տրիլիոն ռուբլի։

Միաժամանակ նախատեսվում է 2024 թվականին սոցիալական քաղաքականության վրա ծախսել 7,5 տրլն ռուբլի (2023 թվականին՝ 6,5 տրլն)։ Այսպիսով, նշում է Faridaily հեռագրային ալիքը, 2024 թվականին Ռուսաստանի պատմության մեջ առաջին անգամ բանակի  ծախսերը կգերազանցեն «Սոցիալական քաղաքականություն» կետի ծախսերը, որը ներառում է կենսաթոշակներ, նպաստներ և այլ սոցիալական վճարումներ:

Բյուջեի գաղտնի հոդվածների գծով ծախսերը, որոնց զգալի մասը, ենթադրվում է, որ կապված է պատերազմի հետ, ըստ Bloomberg-ի, այս տարի 6,5 տրիլիոն ռուբլուց կաճի մինչև 11,1 տրիլիոն ռուբլի և կկազմի բյուջեի բոլոր ծախսերի մեկ երրորդը:

Բացի այդ, Ռուսաստանի իշխանությունները նախատեսում են փոքր-ինչ ավելացնել ազգային անվտանգության ծախսերը՝ միաժամանակ կրթության և առողջապահության ծախսերը պահելով նույն մակարդակի վրա՝ համապատասխանաբար 1,5 և 1,6 տրիլիոն ռուբլի։

Բյուջեի նախագծով 2024 թվականին ընդհանուր ծախսերը կանխատեսվում են 36,6 տրիլիոն ռուբլու չափով, ինչը 15 տոկոսով ավելի է, քան 2023 թվականին։ Միևնույն ժամանակ, գրում է Bloomberg-ը, չնայած ռազմական ծախսերի և պատժամիջոցների կտրուկ աճին, ՌԴ կառավարությունն ակնկալում է, որ բյուջեի եկամուտները կկազմեն ավելի քան 35 տրիլիոն ռուբլի՝ 22 տոկոսով ավելի, քան 2023 թվականին։ Բյուջեի դեֆիցիտը 2024 թվականին, ըստ փաստաթղթի, կկազմի ՀՆԱ-ի 0,9 տոկոսը։