Մեծ Բրիտանիայի նախկին վարչապետ Թոնի Բլերը հայտնվել է ճնշման տակ՝ Ադրբեջանի հետ խոշոր էներգետիկ համաձայնագրի համար լոբբինգ անելու առիթով այն բանից հետո, երբ Ադրբեջանի նախագահը ռազմական հարձակում է սկսել էթնիկ հայերով բնակեցված Լեռնային Ղարաբաղում, գրում է Politico-ն։
Բլերը, թողնելով Մեծ Բրիտանիայի վարչապետի պաշտոնը, սերտ կապեր է հաստատել Ադրբեջանի նախագահ Իլհամ Ալիևի հետ և սկսել միլիոններ վաստակել՝ աշխատելով որպես խորհրդատու կառավարությունների և ընկերությունների համար աշխարհով մեկ: Նրան վարձել են 2014 թվականին՝ որպես խորհրդական BP-ի գլխավորած կոնսորցիումում, որը ցանկանում էր բնական գազ արտահանել Ադրբեջանից Եվրոպա․ դա Ալիևի նախագիծն էր:
2018 թվականին Բլերը Իտալիայի այն ժամանակվա ներքին գործերի նախարար Մատեո Սալվինիի հետ հանդիպման ժամանակ քննարկել է այսպես կոչված Անդրադրիատիկ գազատարը, որն ավարտվում է Ապուլիայում։ Գազատարը շահագործման է հանձնվել 2020թ.։ Լեռնային Ղարաբաղում Ալիևի ռազմական գործողություններից հետո բրիտանական Amnesty International-ի գործադիր տնօրեն Սաշա Դեշմուխը Politico-ին ասել է, որ Բլերը պետք է պատասխանի տարածաշրջանում աշխատելու իր որոշման վերաբերյալ հարցերին:
Նա նշել է, որ Բլերը «պետք է ցույց տա, որ Ադրբեջանի կառավարությանը խորհուրդներ տրամադրելու իր դերը չի ներառում մարդու իրավունքների խախտումներին անմիջական մասնակցություն կամ այնպիսի խորհրդատվություն, որը որևէ կերպ ուղղված է խուսափելուն կամ նվազագույնի հասցնելուն Ադրբեջանի կողմից մարդու իրավունքների օրենքներին և չափանիշներին համապատասխանելը»: 2016-ին Բլերը փակեց Tony Blair Associates-ը՝ իր հիմնական միջազգային խորհրդատվական ընկերությունը, և ազդարարեց, որ կենտրոնանալու է բարեգործական գործունեության վրա: Թոնի Բլերի գլոբալ փոփոխությունների ինստիտուտը, որը նրա շահույթ չհետապնդող կազմակերպությունն է՝ հիմնադրված 2016 թվականին և գործում է 30 երկրներում, հայտարարել է, որ այն չի գործում Ադրբեջանում:
