Ուկրաինայի դեմ Ռուսաստանի սանձազերծած պատերազմի արդյունքները վճռորոշ կլինեն ոչ միայն հարևան երկրների և տարածաշրջանի, այլ նաև ողջ աշխարհի համար, կարծում է հայտնի ամերիկացի քաղաքագետ, Սթենֆորդի համալսարանի ավագ գիտաշխատող Ֆրենսիս Ֆուկույաման։
«Կախված այս պատերազմի արդյունքից՝ շատ բան կարող է փոխվել մյուս երկրներում։ Վրաստանը, Մոլդովան և Ղազախստանը. այս երկրներից յուրաքանչյուրն անմիջական ազդեցություն կզգա, եթե Ռուսաստանը հաղթի, դիմանա և կարողանա պահպանել գրաված ուկրաինական տարածքները», - ասել է Ֆուկույաման: Պատերազմի հետևանքները կազդեն նաև Հարավարևելյան Ասիայի վրա, վստահ է նա։
Նմանապես, պատերազմի արդյունքը կազդի Միացյալ Նահանգների ներքաղաքական իրավիճակի վրա, որտեղ աջ քաղաքական ուժերի ներկայացուցիչները ձգտում են ավելի ավտորիտար մոդելի կամ այսպես կոչված «ուժեղ ձեռքի»՝ նախընտրելով իրենց առաջնորդ տեսնել Պուտինի նման մեկին, շարունակել է հետազոտողը։
