Ղազախստանում հնագետները հայտնաբերել են 3800 տարվա վաղեմության վեցանկյուն կառույց, որը նրանք նկարագրում են որպես «բուրգ»: Լաբիրինթոսի ձևով կառույցն այնքան բարձր չէ, որքան եգիպտական հուշարձանները, դրա ներկայիս բարձրությունը մոտ 3 մետր է և, հավանաբար, ծառայել է որպես էլիտար հուղարկավորման վայր, հաղորդում է Planet Today-ը:
Ղազախստանի Եվրասիական ազգային համալսարանի հաղորդման համաձայն, հայտնագործությունը նման չէ «նախկինում եվրասիական տափաստանում հայտնաբերված» որևէ բանի։
«Արևելյան Ղազախստանի տարածքում այս բուրգը հայտնաբերվել է այս տարի։ Այն ունի վեցանկյուն ձև, որի յուրաքանչյուր անկյունում մինչև 1 տոննա կշռող մեգալիթներ են տեղադրված»,- ասել է պեղումների ղեկավար, հնագետ Ուլան Ումիտկալիևը։
Բրոնզեդարյան հուշարձանը նման չէ Եգիպտոսում հայտնաբերված բուրգերին։ Նրա արտաքին քարե պատերը կազմում են վեցանկյուն, իսկ կառույցի ներքին պատերը հիշեցնում են լաբիրինթոս, որը տանում է դեպի կենտրոնում գտնվող գերեզմանը։
Այդ ժամանակաշրջանում ապրող մարդիկ կառուցել են բազմաթիվ գերեզմաններ և քարե հուշարձաններ, զբաղվել մետաղագործությամբ և ոսկերչությամբ։ Նրանց տնտեսությունը, հնարավոր է, մասամբ անասնաբուծական էր. նրանք մեծ քանակությամբ կենդանիներ էին արածեցնում եվրասիական տափաստաններում:
Բուրգի արտաքին պատերը զարդարված են տարբեր կենդանիների, այդ թվում՝ ուղտերի և բազմաթիվ ձիերի ժայռապատկերներով։ Բուրգի մոտ հայտնաբերվել են ձիու ոսկորներ, և ձիերի պաշտամունքը, հավանաբար, այդ ժամանակաշրջանում ծաղկել է:
Կառույցը կառուցվել է մ.թ.ա 19-րդ դարում։ Տեղում պեղումները և գտածոների վերլուծությունը շարունակվում են, մինչ այժմ հնագետները հայտնաբերել են կերամիկա, կանացի ոսկյա ականջօղեր և այլ զարդեր:
