Բրյուսելը դատապարտել է Կոսովոյի հյուսիսում ոստիկանների վրա հարձակումը, որի հետևանքով մեկ սպա է զոհվել, ևս երկուսը վիրավորվել են։ Եվրամիությունը «խստորեն դատապարտում է զինված հանցախմբի կողմից Կոսովոյի ոստիկանների վրա Բանսկայում տեղի ունեցած նողկալի հարձակումը», - ասել է ԵՄ արտաքին գործերի և անվտանգության քաղաքականության հարցերով գլխավոր ներկայացուցիչ Ժոզեպ Բորելը։
ԵՄ դիվանագիտության ղեկավարը կոչ է արել պարզել միջադեպի բոլոր հանգամանքները և հանցագործներին պատասխանատվության ենթարկել, հայտնում է DW-ն։
«Ավելի շատ անմեղ մարդիկ են վտանգի տակ Բանսկա վանքի շրջակայքում շարունակվող մարտերի պատճառով: Այս հարձակումները պետք է անհապաղ դադարեցվեն», - գրել է Բորելը։
Բացի այդ, նա նշել է, որ արտակարգ իրավիճակների արձագանքման ծառայությունը տեղում սերտ կապի մեջ է իշխանությունների և ՆԱՏՕ-ի խաղաղապահ առաքելության KFOR-ի հետ։ ԵՄ-ն և նրա անդամները ևս մեկ անգամ կոչ են անում հակամարտող կողմերին միջոցներ ձեռնարկել Հյուսիսային Կոսովոյում լարված իրավիճակը լիցքաթափելու համար, ասվում է հայտարարության մեջ։
