Հունգարիայի վարչապետ Վիկտոր Օրբանը սպառնացել է դադարեցնել Ուկրաինային աջակցությունը էթնիկ հունգարների իրավունքների սահմանափակման հետ կապված մտավախության առիթով, գրել է The Hill-ը։

Օրբանը խորհրդարանին տեղեկացրել է, որ դեմ է Ուկրաինայի 2017թ. օրենքին, որը սահմանափակում է էթնիկ հունգարների մայրենի լեզվի իրավունքները, հատկապես դպրոցներում, եւ հայտարարել է, որ Հունգարիան չի աջակցի Ուկրաինային միջազգային հարցերում «այնքան ժամանակ, մինչեւ որ նախորդ օրենքները չվերականգնվեն»։

Նա ասել է. «Հունգարիան ամեն ինչ անում է խաղաղության համար» Ուկրաինայի պատերազմում։ «Բայց, ցավոք, ռուս-ուկրաինական պատերազմը շարունակվում է, զոհ են դառնում տասնյակ հազարավոր մարդիկ։

Հունգարիան բազմիցս քննադատել է Եվրամիության օգնության փաթեթներն Ուկրաինային։

Օրբանը նշել է, որ չարժե շտապել ՆԱՏՕ-ին Շվեդիայի անդամակցության հայտը վավերացնելու հարցում։ Միայն Հունգարիան եւ Թուրքիան առայժմ չեն վավերացրել Շվեդիայի անդամակցությունը։

Հունգարիան  եվրոպական երեք երկրներից մեկն է, որը վեճի մեջ է Ուկրաինայի հետ ցորենի ներմուծման հարցում։

Այս ամիս Ուկրաինան հայտարարել է, որ դատի կտա Լեհաստանին, Հունգարիային եւ Սլովակիային հացահատիկի ներմուծումն արգելելու համար։

Հացահատիկի շուրջ վեճը զայրացրել է Լեհաստանին։ Վարչապետ Մաթեուշ Մորավիցկին անցած շաբաթ հայտարարել է, որ իր երկիրն այլեւս զենք չի մատակարարի Ուկրաինա։

Վարշավայի այս քայլը կտրուկ շրջադարձ էր, քանի որ Լեհաստանը Ուկրաինա զենքի խոշոր մատակարարն է եւ նրա ամենահավատարիմ դաշնակիցներից մեկն էր։ Դա հանգեցրել է աճող մտավախության Արեւմուտքի կողմից Ուկրաինային աջակցության հարցում, քանի որ Ուկրաինան հենվում է Եվրոպայի եւ ՆԱՏՕ դաշնակիցների վրա ռազմական գործողություններ վարելիս։