Արցախի դեմ Ադրբեջանի ագրեսիայի օրերին իսրայելական ԶԼՄ-ները որեւէ կերպ չեն արձագանքել այդ արյունալի իրադարձություններին, դա խիստ բացասական միտում է։ Այս մասին NEWS.am-ի հետ զրույցում հայտարարել է քաղաքագետ Մենդել Կորսունսկին։

Նրա խոսքով՝ լռության քաղաքականությունը սկսվել է դեռ անցած տարվա դեկտեմբերից, երբ Ադրբեջանը սկսեց Արցախի շրջափակումը՝ անցակետ դնելով Լաչինի միջանցքում, դրանով իսկ տալով հումանիտար ճգնաժամի մեկնարկը. «Տեղի ԶԼՄ-ները ոչ մի կերպ չարձագանքեցին Արցախի շրջափակմանը եւ հումանիտար ճգնաժամին, նաեւ գրեթե ոչ մի արձագանք չեղավ Արցախի հայ բնակչության դեմ ագրեսիայի սկզբից։ Ես անձամբ Ադրբեջանի գազանությունների մասին ապացույցներ եմ ուղարկել շատ պարբերականների... պատասխան այդպես էլ չի եղել։ Ցավոք, այս միտումը այն բանի ապացույցն է, որ ԶԼՄ-ներն Իսրայելում արդեն ազատ չեն, ինչպես առաջ»։

Կորսունսկին նշել է, որ միայն քչերը հավատարիմ մնացին լրագրողի մասնագիտությանը. «Հանուն արդարության արժե նշել Haaretz թերթը, որտեղ հայտնվեց հրապարակում «Բավական է զենք վաճառեք Ադրբեջանին եւ օգնեք հայերի դեմ նրա պատերազմին» վերնագրով։ Մեկ անգամ եւս ցանկանում եմ նշել Յուավ Զեավին Առաջին ալիքից, որը հոդված գրեց Արցախի իրավիճակի եւ նրա հայ բնակչության ողբերգության մասին»։