Փաշինյանի բանավոր հայտարարությունները սպասարկում են հայերի նկատմամբ թուրք-ադրբեջանական ցեղասպան քաղաքականությունը։ Այս մասին հայտարարել է Հայաստանի առաջին օմբուդսմեն Լարիսա Ալավերդյանը՝ մեկնաբանելով սեպտեմբերի 21-ին ՀՀ վարչապետի կողմից արված հայտարարությունը Լեռնային Ղարաբաղի բնակչության համար ուղղակի սպառնալիքի բացակայության մասին։
«Փաշինյանի ասածը կարելի էր նորմալ հայտարարություն ընդունել Ադրբեջանի նախագահի, ադրբեջանցի բարձրաստիճան պաշտոնյաների շուրթերից։ Հայաստանի վարչապետի շուրթերով դա ժխտում է այն ամենը, ինչ ասում եմ ոչ միայն ես, այլ հայտնի ցեղասպանագետներ։ Սա պատահական հայտարարություն չէ»,-նշեց նա։
«Սա ոչ մի բանով չի տարբերվում 1915 թվականի Ցեղասպանությունից։ Սա նույնիսկ չի կարելի համեմատել հրեաների Հոլոքոստի հետ, երբ հանցագործությունը չի կատարվել հրեա ժողովրդի պատմական հայրենիքում։ Այժմ տեղի է ունենում հայ ազգի մի մասի ոչնչացում իր պատմական հայրենիքում եւ զրկում այդ հայրենիքից»,-ասաց Ալավերդյանը։
Հիշեցնենք, որ վերոնշյալ հայտարարությունը նույն օրը ՄԱԿ-ի ԱԽ նիստում մեջբերել էր Ադրբեջանի արտգործնախարարը՝ որպես Լեռնային Ղարաբաղում նորմալ իրադրության «ապացույց»։
