Մենք շատ անհանգստացնող հաղորդումներ ենք ստացել քաղաքացիական անձանց նկատմամբ գործողությունների, բռնությունների վերաբերյալ: Այս մասին այսօր՝ սեպտեմբերի 26-ին, Կոռնիձորում լրագրողների հետ զրույցում նշեց ԱՄՆ Միջազգային զարգացման գործակալության (USAID) ղեկավար Սամանթա Փաուերը՝ անդրադառնալով հարցին, թե արդյոք կարծում է, որ Ադրբեջանի իշխանությունների գործողությունները միայն ռազմական թիրախներին էին ուղղվա՞ծ, թե նաեւ քաղաքացիական թիրախների:
«Միաժամանակ հաշվի առնելով այս պահին քաոսային իրավիճակը, եւ այս տրավման, որի միջով մարդիկ նցել են, պետք է լսել մարդկանց պատմությունները՝ իրավիճակը հասկանալու համար եւ այդ աշխատանքը նոր է սկսվում: Հաղորդումներն ընդգծում են, որ պետք է անկախ աչքեր լինեն ԼՂ տարածքում եւ դա լինի հիմա»,-ասաց նա:
Հարցին, թե ժամանակը չէ՞, որ միջազգային հանրությունը դիմի ավելի կոշտ միջոցների, այդ թցվում պատժամիջոցների Ադրբեջանի դեմ, Փաուերը պատասխանեց. «Նախագահ Բայդենի հանձնարարականով ես այստեղ եմ եկել, որպեսզի խոսեմ իշխանություններ, ՀԿ-ների եւ մարդկանց հետ, որոնք այդ սարսափելի իրավիճակում փախուստի են դիմում: Ես եւ նախագահ բայդենը կարեւորում ենք այն հարցի հրատապությունը, թե ինչ հետեւանքներ պետք է ունենա եւ որի մասին դուք շատ հարցեր եք տալիս: Դրա համար եմ ես այստեղ, որ տեղում փաստերին ծանոթանամ, նաեւ խորհրակցենք տարածաշրջանի իշխանությունների, մասնավորապես ՀՀ իշխանությունների հետ:
Երբ ես վերադառնամ, ներկայացնեմ պատմությունները, այդ ամենը օգնելու է, որպեսզի ԱՄՆ նախագահը, վարչակազմը կարողանան դիտարկվող տարբերակներից ընտրեն այն մեկը, որը կկիրառվի: Ես ուզում եմ նշել, որ այս պահին ակտիվ դիտարկվում են ձեռնարկվող քայլերի մի քանի տարբերակներ: Լինելով այստեղ, ես իմ տեսածը, լսածը ներկայացնելու եմ վարչակազմի իմ գործընկերներին, թե որքան ծանր է իրավիճակը ԼՂ բնակիչների համար: Միաժամանակ, մենք պատրաստ ենք աշխատել փախուստի դիմած մարդկանց կարիքները հոգալու համար»:
