ԱՄՆ նախագահ Ջո Բայդենը սկսել է ավելի հաճախ նախընտրել թենիսի մարզակոշիկները հանրության շրջանում պարբերական սայթաքումների ֆոնին, հայտնում է Axios-ը։
«Քանի որ ընտրողները խորը մտահոգություններ են հայտնում նախագահի տարիքի և պաշտոնում նրա պիտանիության վերաբերյալ, Բայդենի թիմը լրացուցիչ քայլեր է ձեռնարկում, որպեսզի թույլ չտա նրան սայթաքել հանրության առաջ», - գրում է Axios-ը: Մասնավորապես, հունիսին սայթաքելուց հետո նա սկսել է ավելի հաճախ թենիսի կոշիկներ կրել՝ սայթաքելուց խուսափելու համար, նշում է պորտալը։
Բայդենի կուսակցության մի շարք ներկայացուցիչներ մտավախություն ունեն, որ նախագահը կարող է կրկին ընկնել, հատկապես 2024 թվականին կայանալիք նախագահական ընտրությունների ֆոնին, նշվում է հրապարակման մեջ։
Այսպես, Դեմոկրատական կուսակցության որոշ անդամներ մասնավոր զրույցներում դժգոհություն են հայտնում Բայդենի թիմից՝ պետության ղեկավարի պարբերաբար անհարմար իրավիճակներում հայտնվելու պատճառով։ Հաճախ թվում է, թե նախագահը չգիտի ուր գնալ ելույթից հետո, ասվում է տեքստում:
Ջո Բայդենը 2021 թվականի հունվարին պաշտոնը ստանձնելուց ի վեր քանիցս գետնին է ընկել հասարակության աչքի առաջ: Նույն տարում Բայդենը մի քանի անգամ ընկել է ինքնաթիռի թեքահարթակով բարձրանալիս, իսկ 2022 թվականին նա չի կարողացել պահել հավասարակշռությունը Դելավեր նահանգի Ռեհոբոթ Բիչում հեծանվով զբոսնելիս։ Վերջին անգամ ԱՄՆ նախագահը սայթաքել է ավազի պարկի վրա Կոլորադո նահանգում ԱՄՆ ռազմաօդային ուժերի ակադեմիայի ավարտական արարողության ժամանակ վկայականներ հանձնելիս 2023 թվականի հուլիսին: Այս բոլոր միջադեպերը հաճախ ակտիվորեն լուսաբանվում էին պահպանողական լրատվամիջոցներում և ուժեղացնում էին ընդդիմադիր Հանրապետական կուսակցության քաղաքական գործիչների փաստարկները, որ Բայդենը չափազանց ծեր է պետությունը ղեկավարելու համար:
