Աճյունների տեղափոխման հարցը մինչ այս պահը կազմակերպված է եղել, և այսօր նույնպես աշխատանքներն այդ ուղղությամբ շարունակվում են: Այս մասին այսօր՝ սեպտեմբերի 26-ին, մամուլի ասուլիսի ժամանակ նշեց ՀՀ փոխվարչապետ Տիգրան Խաչատրյանը՝ ներկայացնելով զոհվածների աճյունների տեղափոխման և բենզալցակայանում տեղի ունեցած պայթյունի հետևանքով այրվածքներ ստացած ու ծանր վիճակում գտնվողների՝ Հայաստան տեղափոխելու գործընթացը:
«Մի քանի ժամ առաջ Կոռնիձորով Հայաստան տեղափոխվեցին այն աճյունները, որոնք վերջին դեպքերի հետ էին կապված, և համապատասխան աջակցության արդյունքում կհասցվեն մարդկանց հարազատներին՝ համապատասխան հուղարկավորություն կազմակերպելու համար:
Բայց նաև մենք այս լարված իրավիճակում հատկապես մեծ ջանքեր ենք գործադրում, որպեսզի կարողանանք արագ տեղափոխել դեպի Հայաստան այն մարդկանց, որոնք ունեն առողջական լուրջ վնասներ նույն այս դեպքերի առնչությամբ, և ոչ միայն, որովհետև նախորդ օրերին ևս հիվանդանոցներում գտնվում էին մարդիկ, որոնց առողջական վիճակը պահանջում էր շուտափույտ տեղափոխում:
Ինչո՞ւ եմ ասում, որ դժվարություններ կային: Որովհետև գիտեք, որ ընդամենը մեկ ճանապարհ է միացնում, որտեղ մարդկանց միաժամանակ մեծ հոսքի պատճառով երեկ երեկոյան այնպիսի իրավիճակ էր, որ երթևեկությունը հնարավոր էր միայն 1 կողմից, և 5 շարքով մեքենաների կուտակման պատճառով աներթևեկելի էր դարձել (ճանապարհը - խմբ.) երկար կիլոմետրեր տարածության վրա: Այսինքն՝ ֆիզիկապես ամենամեծ ցանկության դեպքում անգամ մեր կողմից դեպի Ստեփանակերտ գնալը շատ դժվար էր:
Այդ դժվարին հանգամանքներում առողջապահության նախարարությունը, մեր մյուս գործընկերները, որոնք որոշակի ընթացակարգեր պետք է համաձայնեցնեին, այդ թվում՝ ՌԴ խաղաղապահների հետ, կարողացել են համաձայնեցնել օդային փոխադրումների եղանակով վատ առողջական վիճակում գտնվող մարդկանց որոշ մասի տեղափոխումը»,- ասաց Տիգրան Խաչատրյանը:
Նա նաև հիշեցրեց, որ այսօր՝ ժամը 15:00-ի սահմաններում, վերջապես հնարավոր եղավ Ստեփանակերտ ուղարկել 2 տասնյակը գերազանցող շտապօգնության մեքենաներ, որոնք դեպի Հայաստան պետք է փոխադրեն այնտեղ գտնվող՝ ծանր առողջական վիճակով մարդկանց:
Տիգրան Խաչատրյանը նաև հիշեցրեց, որ մի քանի ժամ առաջ ուղղաթիռով Այրվածքաբանական կենտրոն է տեղափոխվել 7 անձ, որոնք տուժել էին բենզալցակայանի պայթյունից:
