Նյու Յորքի դատավորը որոշել է, որ Դոնալդ Թրամփը եւ նրա ընտանիքի անդամները խաբեությամբ բարձրացրել են նրա անշարժ գույքի եւ այլ ակտիվների արժեքը, սա կարող է լրջորեն սահմանափակել նահանգում նրա բիզնես վարելու հնարավորությունը, տեղեկացրել է Reuters-ը։
Նյու Յորքի նահանգի դատավոր Արթուր Էնգորոնի որոշումը կհեշտացնի նահանգի գլխավոր դատախազ Լետիցիա Ջեյմսի՝ վնասի չափը սահմանելու խնդիրը հոկտեմբերի 2-ին նախատեսված նիստում։
Էնգորոնը կարգադրել է զրոյացնել այն վկայականները, որոնք Թրամփի որոշ ձեռնարկությունների, այդ թվում Trump Organization-ը, թույլ էին տալիս աշխատել Նյու Յորքում։
Նրա խոսքով՝ Թրամփը, նրա որդիներ Դոնալդ-կրտսերը եւ Էրիկը, Թրամփի կազմակերպությունը եւ այլ պատասխանողներ կազմել են սեփական կապիտալի գնահատականն ու ուռճացրել այն, որպեսզի բավարարեն իրենց գործնական կարիքները։ «Սա երեւակայության, այլ ոչ թե իրականության աշխարհ է»,- գրել է Էնգորոնը։
Դատավորը նաեւ պատժամիջոցներ է սահմանել փաստաբանների համար, որոնք մեղադրվում են «անհեթեթ» իրավաբանական փաստարկներ ներկայացնելու համար։
Թրամփը հավաստիացնում է, որ երբեք խարդախություն չի կատարել, եւ վիճարկվող տրանզակցիաները շահավետ էին։ Նա բողոքարկելու է որոշումը։
«Այսօրվա վրդովեցուցիչ որոշումը չի համապատասխանում փաստերին եւ գործող օրենսդրությանը»,- ասել է Թրամփի փաստաբան Քրիստոֆեր Քիզը։ «Նախագահ Թրամփը եւ նրա ընտանիքը օգտագործում են բոլոր հնարավոր բողոքարկման միջոցները, որպեսզի շտկեն այս դատական սխալը»։
