Գերմանիան ժամանակից շուտ լցրեց գազի պահեստարանները մինչև 95 տոկոս: Սեպտեմբերի 26-ի առավոտվա դրությամբ երկրի գազապահեստարանները լցված են 95,05 տոկոսով, չորեքշաբթի՝ սեպտեմբերի 27-ին, հայտնել է GIE գազի ենթակառուցվածքի օպերատորների եվրոպական ասոցիացիան։ Անցյալ տարի գազի ճգնաժամի պայմաններում ընդունված կանոնակարգի համաձայն՝ մինչև նոյեմբերի 1-ը Գերմանիայի գազի պահեստարանները պետք է լցված լինեին մինչև 95 տոկոս, հայտնում է DW-ն։
Գերմանիայի գազապահեստարաններն այս տարի ավելի արագ են լցվում, քան անցյալ տարի։ 2022 թվականի սեպտեմբերի 26-ին զբաղվածությունը կազմել է 91.4 տոկոս։ Անցյալ տարի 95 տոկոսի թիրախը կատարվել է հոկտեմբերի 13-ին, 100 տոկոսով՝ նոյեմբերի 14-ի առավոտյան:
Ձմռանը գազապահեստարանների լիցքավորման մակարդակը սովորաբար նվազում է, իսկ ջեռուցման սեզոնի վերջում կրկին ավելանում է։ Գերմանական կառավարության նախորդ հաշվարկների համաձայն՝ պահեստարանները 100 տոկոսով լցնելը կապահովի գազամատակարարումը ձմռան երկու-երեք ցուրտ ամիսների համար:
Գերմանական ամենամեծ գազի պահեստարանը Ներքին Սաքսոնիայի Ռեհդեն քաղաքում, որը մինչև անցյալ տարվա ապրիլի սկիզբը գտնվում էր ռուսական «Գազպրոմ» կոնցեռնի վերահսկողության տակ, սեպտեմբերի 26-ի առավոտյան 97,42 տոկոսով լցված էր։
«Իրավիճակը 2023-2024 թվականների ձմռանն ընդառաջ զգալիորեն ավելի լավ է, քան մեկ տարի առաջ, բայց մնացորդային ռիսկերը մնում են», - անցած շաբաթ հայտնել է Դաշնային ցանցային գործակալությունը:
