Ռուսաստանի նախագահը 2020-ի դեկտեմբերին հայտարարել է, որ ԼՂ-ն Ադրբեջանի անխախտելի մաս է կազմում: Այս մասին այսօր՝ սեպտեմբերի 27-ին, «Եռաբլուրում» լրագրողների հետ զրույցում նշեց ԱԺ ՔՊ խմբակցության պատգամավոր, պաշտպանության նախկին փոխնախարար Գագիկ Մելքոնյանը՝ անդրադառնալով նրան, որ Ռուսաստանը անընդհատ մատնանշում է փաստը, որ ՀՀ վարչապետը ճանաչել է Ադրբեջանի տարածքային ամբողջականությունը, Արցախը ներառյալ, եւ դա փոխել է իրավիճակը Արցախի հարցում:
«Մենք ունեցել ենք 3 նախագահ, նրանց ո՞ր մեկն է ասել, որ Արցախը Ադրբեջանի կազմում չէ: Միջազգային բոլոր հանդիպումների ժամանակ նրանք լուռումունջ ստորագրել ու ճանաչել են, որ Արցախը Ադրբեջանի մաս է: Իրենք չեն ասել այդ մասին ժողովրդին: Հրապարակավ չեն հայտարարել, որովհետեւ էդ դուխը չեն ունեցել: Ժողովրդից վախեցել են ու չեն ասել, որ նման բան կա: Փաշինյանն ասել է, որ Ղարաբաղն Ադրբեջանի կազմում է, բայց դրանից առաջ Պուտինն է ասել»,-ասաց նա:
Գագիկ Մելքոնյանը հայտարարեց, որ Ադրբեջանը ստում է, երբ ասում է, որ Նիկոլ Փաշինյանը տեղյակ է եղել իրենց կողմից իրականացված գործողության մասին, որով օկուպացվեց ամբողջ Արցախը. «Իրենք ուզում են բոլորին ամեն ինչ խառնել իրար, որ մեր ներքին կայունությունը խաթարվի եւ մենք գնանք քաղաքացիական պատերազմի»:
Հարցին, թե ինչպե՞ս է Հայաստանն առանց Արցախի պահելու իր ինքնիշխանությունը, անկախությունը եւ անվտանգությունը, պատգմավորը պատասխանեց. «Մեր բանակը հիմա վերակառուցվում է, վերազինվում է եւ մենք պետք է ամեն ինչ անենք, որ մեր անկախությունը չխաթարվի, մեր երկրի անվտանգությունը պահպանենք»:
