Բոլոր հայերը, որոնք պայքարում են հայկական պետականությունների համար, թշնամի են Ալիեւին, Էրդողանին ու Նիկոլին. Բանաձեւը մեկն է. շահում է Նիկոլը՝ շահում է Ալիեւը, շահում է Էրդողանը՝ շահում է Նիկոլը, եւ տուժում, քայքայվում ու կործանվում է հայկական պետականությունը: Այս մասին այսօր՝ սեպտեմբերի 27-ին, լրագրողների հետ զրույցում նշեց ԱԺ «Պատիվ ունեմ» խմբակցության պատգամավոր Աննա Մկրտչյանը՝ անդրադառնալով նրան, որ այսօր Ադրբեջանը ձերբակալել եւ բաքու է տեղափոխել Արցախի նախկին պետնախարար Ռուբեն Վարդանյանին:
«Ադրբեջանը բոլորիս համար պատրաստել են եւ ցանկանում են մեկ ճակատագիր՝ Բաքվի բանտերում տանջամահ լինել: Իսկ այն, որ Սամվել Բաբայանն առոք-փառոք հասել է Երեւան ու Հ1-ի տաղավարում բարբաջում է, դա խոսում է այն մասին, որ ինքը Նիկոլի կողմից ստացել է հնարավոր բոլոր երաշխիքները: Հատուկ կապով կապվել, ասել են՝ Սամոն մեզնից է, հայոց պետականությունը կործանողների շարքին է պատկանում, թողեք թող գա»,-ասաց նա:
Անդրադառնալով նրան, որ Սամվել Բաբայանն ասում է, որ ինքն առանց խոչընդոտի անցել է Հակարի կամրջով, իրեն չեն ճանաչել, Աննա Մկրտչյանն ասաց. «Ինքը երեկ իր խոսքի մեծ մասը նվիրել է իրավական քննություն անցկացնելուն: Ես իրեն մաղթում եմ այդ իրավական քննությունը: Եթե բարձր չի հնչի, նաեւ խոստանամ, որ ՀՀ իրավական համակարգի վերականգնումից հետո, ինքն այդ իրավական քննությանն ու դատական համակարգին մոտիկից կծանոթանա»:
Նա հայտարարեց, որ կզարմանար, որ «Նիկոլի առաջ կզած» Սամվել Բաբայանը Արցախը պահած հերոսների, մասնավորապես, Սերժ Սարգսյանի մասին դրական բաներ ասել. «Երեւի ազատության գինն է դա, երեւի չնստելու գինն է դա, երեւի Դավիթ Տոնոյան չդառնալու գինն է դա: Ինքը կիմանա»:
