Չորեքշաբթի օրը Մարդու իրավունքների եվրոպական դատարանը կլսի վեց երիտասարդների ներկայացրած աննախադեպ հայցը եվրոպական 32 երկրների դեմ՝ վերջիններին մեղադրելով մարդու գործունեությամբ առաջացած կլիմայական ճգնաժամը չհաղթահարելու մեջ, հայտնում է CNN-ը։
Դիմումատուները, 11-ից 24 տարեկան, բոլորը Պորտուգալիայից, պնդում են, որ իրենք կլիմայի փոփոխության դեմ պայքարի առաջին գծում են և խնդրում են դատարանին ստիպել այս երկրներին արագացնել կլիմայական փոփոխությունների դեմ պայքարը։
Սա կլիմայի մասին առաջին գործն է, որը ներկայացվել է Մարդու իրավունքների եվրոպական դատարան և ամենամեծն է այն երեք կլիմայական գործերից, որոնք դատարանը քննում է:
Խաղադրույքները մեծ են: Հաղթանակը կստիպի երկրներին արագ ընդլայնել իրենց կլիմայական հավակնությունները, ինչպես նաև մեծապես կբարելավի կլիմայական այլ դատավարությունների հնարավորություններն ամբողջ աշխարհում, հատկապես նրանք, որոնք պնդում են, որ երկրները մարդու իրավունքների պարտավորություններ ունեն պաշտպանելու մարդկանց կլիմայական ճգնաժամից:
Այնուամենայնիվ, եթե դատարանը որոշում կայացնի հայցվորների դեմ, դա կարող է վնասել կլիմայական այլ պահանջներին:
Չորեքշաբթի օրվա լսումների ճանապարհը սկսվել է վեց տարի առաջ:
Այդ տարի ավերիչ անտառային հրդեհներն այրեցին Պորտուգալիայի 500 հազար հեկտար տարածք և խլեցին ավելի քան 100 մարդու կյանք: Հենց այս աղետը ծառայեց որպես դատավարության կատալիզատոր:
