ԱՄՆ պետքարտուղարն ուղիղ բանակցություններ է վարել Ադրբեջանի նախագահի, Հայաստանի վարչապետի հետ, մեր մի շարք պաշտոնյաներ այցելել են տարածաշրջան ոչ միայն վերջին շաբաթվա կամ 10 օրվա ընթացքում, երբ սկսվել են ռազմական գործողությունները, այլ նաև մի քանի ամիս առաջ։ Այս մասին այսօր կայացած ճեպազրույցում հայտարարել է ԱՄՆ պետքարտուղարության մամուլի քարտուղար Մեթյու Միլլերը։
«Մենք ամեն ինչ արել ենք դիվանագիտական լուծում գտնելու համար, բայց վերջիվերջո չպետք է մոռանալ, որ այստեղ կան երկու կողմեր, որոնք ուղղակի տարաձայնություններ ունեն։ Մենք կարող ենք ամեն ինչ անել նրանց մերձեցնելու համար, բայց, ի վերջո, նրանք պետք է համաձայնեն խոսել միմյանց հետ և ի վերջո գան ինչ-որ կարգավորման: Դա այն է, ինչ մենք պատրաստվում ենք անել, շարունակել խաղալ մեր դերը այս գործընթացին աջակցելու գործում»,- ասաց նա։
Պետքարտուղարության մամուլի քարտուղարը պատասխանել է Արցախում կատարվող իրադարձություններում Ռուսաստանի դերի մասին հարցին։
Նրա կարծիքով, Ռուսաստանը վերջին շաբաթվա ընթացքում ոչ մի արդյունավետ դեր չի խաղացել Լեռնային Ղարաբաղում։
«Եղել են դեպքեր, երբ մենք տեսել ենք, որ նրանք նպաստում են բանակցություններին, և մենք ողջունել ենք դա, բայց, իհարկե, անցյալ շաբաթ նրանց դերն այդ իրավիճակում արդյունավետ չի եղել», - ասել է Միլլերը:
Միլլերը պատասխանել է նաև Ադրբեջանի կողմից Լաչինի միջանցքն անցնելուց հետո Արցախի նախկին պետնախարար Ռուբեն Վարդանյանի ձերբակալության մասին հարցին։
«Մենք գիտենք ձերբակալության մասին։ Մենք ուշադիր հետևում ենք իրավիճակին. Այսօր այլ մեկնաբանություն չունեմ»,- ասել է նա։
