Նյու Ջերսիի սենատոր Ռոբերտ Մենենդեսը, ով մեղադրվում է կոռուպցիայի մեջ, ԱՄՆ Դեմոկրատական կուսակցության գործընկերների հետ փակ հանդիպման ժամանակ հայտարարել է, որ մտադիր չէ լքել իր պաշտոնը։ Այս մասին հայտնում է Bloomberg-ը՝ հղում անելով Արևմտյան Վիրջինիայից դեմոկրատ սենատոր Ջո Մանչինին։
Նրա խոսքով` Մենենդեսը հայտարարել է Կոնգրեսի վերին պալատում իր տեղը պահպանելու մտադրության մասին՝ չնայած կուսակիցների կողմից հրաժարական տալու բազմաթիվ կոչերին։ Նա նաև հրաժարվել է պատասխանել այն հարցերին, թե արդյոք ինքը կհամագործակցի իր կոռուպցիոն գործով Սենատի հետաքննության հետ:
Սեպտեմբերի 22-ին Նյու Յորքի հարավային շրջանի ԱՄՆ դատախազությունը հայտարարեց Մենենդեսի դեմ մեղադրանքների հարուցման մասին: Մեղադրական եզրակացության համաձայն՝ օրենսդիրն ու նրա կինը «կոռուպցիոն հարաբերությունների մեջ են եղել Նյու Ջերսիի երեք գործարարների հետ» և ստացել են «հարյուր հազարավոր դոլարների կաշառքներ»։
