Սեպտեմբերի 29-ին՝ ժամը 10:00-ի դրությամբ, բռնի տեղահանվածների թիվը կազմում է 88 780 անձ: Այդ մասին հումանիտար կենտրոնի աշխատանքները ներկայացնող ասուլիսի ժամանակ ասաց ՀՀ վարչապետի մամուլի քարտուղար Նազելի Բաղդասարյանը:

«Թվային դինամիկայից երևում է, որ որոշակի ինտենսիվության պակաս է զգացվում։ Ժամը 06։00-ի դրությամբ այդ թիվը 84 հազար 770 էր, իսկ 08։00-ի դրությամբ` 86 հազար 560»,– ասաց Բաղդասարյանը։

Նա հավելեց, որ Հակարիի կամուրջը 10։00-ի դրությամբ հատել է 18 հազար 756 տրանսպորտային միջոց։

Բաղդասարյանը տեղեկացրեց, որ Երևանի քաղաքապետարանի կողմից ուղարկված ավտոբուսները, որոնք երեկ երեկոյան մեկնել էին Ստեփանակերտ, այնտեղից Գորիս են տեղափոխել շուրջ 2000 բռնի տեղահանված անձի։

ՀՀ վարչապետի խոսնակն ասաց, որ այդ ավտոբուսները կրկին մեկնելու են Ստեփանակերտ, և դրանք տեղափոխում կապահովեն մինչև Հայաստան գալու ցանկություն հայտնած վերջին մարդը։

Բաղդասարյանը շեշտեց, որ այս պահի դրությամբ Գորիսի և Վայքի կենտրոններում արդեն 63 հազար 483 անձ է հաշվառվել։

Բաղդասարյանը ներկայացրեց նաև, թե քանի անձ է օգտվել պետության կողմից առաջարկված կեցավայրից. «Նախորդ երեկոյան ունեինք 17,153 ցուցանիշ, այս պահի դրությամբ այն կազմում է 20,306։ Բոլոր նրանց, ովքեր հատում են Հակարիի կամուրջը, առաջարկվում է կեղացայր։ Ուզում եմ ներկայացնել, թե ինչ ցուցանիշ ունենք մարզերում։

Արագածոտնի մարզում՝ 972, Արարատի մարզում՝ 4,658, Արմավիրի մարզում՝ 1,772, Գեղարքունիքում՝ 1,935, Լոռիում՝ 921, Կոտայքում՝ 4,622, Շիրակի մարզում տեղավորվել է 900 անձ, Սյունիքում 2,040, Վայոց ձորում՝ 1,370, Տավուշում՝ 1,116»,- ասաց Նազելի Բաղդասարյանը։