ՌԴ նախագահ Վլադիմիր Պուտինը հանդիպել է պաշտպանության փոխնախարար Յունուս-Բեկ Եվկուրովի և «Վագներ» ՊՄԿ-ի նախկին հրամանատար Անդրեյ Տրոշևի հետ, հայտնում է Կրեմլի մամուլի ծառայությունը։
«Վերջին հանդիպման ժամանակ մենք խոսեցինք այն մասին, որ դուք զբաղվելու եք կամավորական ստորաբաժանումների ձևավորմամբ, որոնք կարող են կատարել տարբեր մարտական առաջադրանքներ, առաջին հերթին, իհարկե, հատուկ ռազմական գործողության գոտում։
Դուք ինքներդ կռվել եք նման զորամասում մեկ տարուց ավելի։ Դուք գիտեք, թե դա ինչ է, ինչպես է դա արվում, գիտեք այն հարցերի մասին, որոնք պետք է նախապես լուծվեն, որպեսզի մարտական աշխատանքն ընթանա լավագույնս և հաջողությամբ։
Ի դեպ, այս առումով կցանկանայի ձեզ հետ զրուցել սոցիալական բնույթի խնդիրների մասին։ Դուք հարաբերություններ եք պահպանում ձեր ընկերների հետ, որոնց հետ միասին կռվել եք, և այժմ շարունակում եք կատարել այս մարտական առաջադրանքները։
Մենք ստեղծել ենք «Հայրենիքի պաշտպաններ» հիմնադրամը, և ես բազմիցս ասել եմ և ուզում եմ նորից շեշտել՝ անկախ մարտական առաջադրանք կատարող կամ կատարած անձի կարգավիճակից, սոցիալական երաշխիքները բոլորի համար պետք է լինեն բացարձակապես նույնը։ Երկրի, հայրենիքի համար տարբերություն չկա, թե մարդն ինչ կարգավիճակով է կռվել և պաշտպանել հայրենիքը»,- հանդիպման ժամանակ նշել է Պուտինը։
