Ռուսաստանն ակնկալում է Ղազախստանի հետ հետագա արդյունավետ աշխատանք՝ առանց արտաքին բացասական ազդեցության։ Այս մասին ТАСС-ին հայտնել են ՌԴ ԱԳՆ-ում՝ մեկնաբանելով հանրապետության նախագահ Կասիմ-Ժոմարտ Տոկաևի հայտարարությունները՝ Ռուսաստանի դեմ արևմտյան երկրների պատժամիջոցների ռեժիմին հետևելու՝ Աստանայի մտադրության մասին։
«Մենք ակնկալում ենք, որ մենք կշարունակենք արդյունավետ աշխատել մեր ղազախ գործընկերների հետ՝ կանխելու բացասական արտաքին ազդեցությունները մեր բարիդրացիական հարաբերությունների վրա, ներառյալ՝ առևտրատնտեսական համագործակցությունը, որը շատ լայնածավալ է և մեծ օգուտներ է բերում երկու երկրներին և լիովին համապատասխանում է իրենց ժողովուրդների շահերին»,- նշել են դիվանագիտական գերատեսչությունում։
Նախարարությունն ընդգծել է, որ Մոսկվան չի միջամտում երրորդ երկրների հետ Ղազախստանի հարաբերություններին։ «Միևնույն ժամանակ, մենք ելնում ենք նրանից, որ Մոսկվայի և Աստանայի միջև կան մի ամբողջ շարք համաձայնագրեր, որոնք սահմանում են մեր հարաբերությունները որպես ռազմավարական գործընկերություն և դաշինք։ Երկկողմ հարաբերությունների այս բնույթը ներառում է կառուցողական փոխգործակցություն քաղաքականության և անվտանգության, առևտրի, ներդրումների և շատ ու շատ այլ ոլորտներում»,- եզրափակել է ՌԴ ԱԳՆ-ն։
Սեպտեմբերի 28-ին Տոկաևը Գերմանիայի կանցլեր Օլաֆ Շոլցի հետ բանակցություններից հետո կայացած մամուլի ասուլիսում ասել է, որ Ղազախստանը կհետևի Ռուսաստանի դեմ սահմանված պատժամիջոցների ռեժիմին, և Բեռլինը չպետք է մտահոգվի այդ կապակցությամբ։
