Առնվազն 50 մարդ է զոհվել, ավելի քան 50-ը՝ վիրավորվել Պակիստանում մահապարտների հարձակման հետևանքով, հայտնում է BBC-ն։
Պայթյունը տեղի է ունեցել հարավարևմտյան Բելուջիստան նահանգի մզկիթի մոտ, երբ մարդիկ հավաքվել էին նշելու Մուհամեդ մարգարեի ծնունդը: Բելուջիստանի իշխանություններն արտակարգ դրություն են հայտարարել։ Հարձակման պատասխանատվությունը ոչ մի խմբավորում չի ստանձնել։
Միաժամանակ առանձին պայթյուն է տեղի ունեցել Խայբեր Փախտունխվա նահանգի Փեշավար քաղաքի մոտ գտնվող մզկիթում։ Փեշավարի մերձակայքում գտնվող Հանգու մզկիթում զոհերի թիվը դեռ հայտնի չէ, սակայն ոստիկանությունը հայտնում է, որ տանիքի փլուզումից հետո մի քանի մարդ կարող էր հայտնվել փլատակների տակ:
Հանգուի մզկիթը ոստիկանական համալիրի մի մասն է, որը կարող է տեղավորել 40-ից 50 մարդ:
Պակիստանի ներքին գործերի նախարար Սարֆրազ Բուգթին պայթյունն անվանել է «շատ զազրելի արարք»: Նա Բելուջիստանում և Հանգուում տեղի ունեցած պայթյուններն անվանել է «ահաբեկչական հարձակումներ»:
