Վերակառուցման և զարգացման եվրոպական բանկի (ՎԶԵԲ) ներդրումները ուկրաինական տնտեսության մեջ 2023 թվականին հասել են 1,2 միլիարդ եվրոյի։ Ինչպես նշվում է վարկային կազմակերպության հաղորդագրության մեջ, դրա ղեկավար Օդիլ Ռենո-Բասսոն այդ մասին հայտնել է Ուկրաինայի նախագահ Վլադիմիր Զելենսկիին Կիևում կայացած հանդիպման ժամանակ։
Նախկինում բանկը խոստացել էր 2022-2023 թվականների համար Ուկրաինային մինչև 3 մլրդ եվրոյի չափով օգնություն տրամադրել՝ տնտեսության իրական հատվածներին և մասնավոր բիզնեսին աջակցելու համար։ ՎԶԵԲ-ի տվյալներով, հաշվի առնելով նախորդ տարի հատկացված 1,7 միլիարդ եվրոն (սա կազմել է նրա ընդհանուր ներդրումների 10%-ը), պարտավորությունը կկատարվի «շատ շուտով»։
Բանկը Ուկրաինային աջակցության հինգ հիմնական ուղղություններ է առանձնացրել: Դրանք են էներգետիկ անվտանգությունը, առևտրային գործողությունների ֆինանսավորումը, հիմնական ենթակառուցվածքների պաշտպանությունը, պարենային անվտանգությունը և դեղագործական ընկերությունների ապահովումը:
