Արցախի Կարմիր Շուկա գյուղից բռնի տեղահանված մի քանի ընտանիք 8 երեխայի հետ մնացել են դրսում։ NEWS.am-ին երեխաների մայրը՝ Լյուդմիլա Մարգարյանը, պատմում է, որ Ստեփանակերտից մինչեւ Կոռնիձոր 4 օր ճանապարհ են եկել, իրենց Վայքի ընդունման կենտրոնում ասել են, որ կամ Վարդենիս, կամ Բերդ պիտի գնան։
«Նոր մի կերպ տեղ են հասել, հիմա էլ տեղ չունենք գիշերելու, երեխեքն առանց ջրի ու բաղնիքի, ոչ մի բանի։ Մեզ ասել են գնացեք Վայքում ներկայացեք, եկել ենք, ասում են՝ գնացեք Վարդենիս։ Վարդենիս գնանք ի՞նչ անենք, եթե Վարդենիս էր, մեր տանը կմնայինք։ Կռվից վախենում ենք, երեխեքից պատվալներից ենք հանել։ Երեխաներս ուսանող են, աղջկաս 2-րդ կուրսից հանել, բերել եմ, հիմա ի՞նչ ենք անելու»,- պատմում է Լյուդմիլա Մարգարյանը։
Հարցին՝ ի՞նչ է պատրաստվում անել ընտանիքը, Լյուդմիլա Մարգարյանն ասում է՝ կգիշերեն ավտոբուսի մեջ, եւ հավելում, որ պետությունից ակնկալիք չունի։
Հիշեցնենք, որ սեպտեմբերի 19-ին 13:00-ից ադրբեջանական կողմը լայնածավալ հարձակման էր անցել Արցախի դեմ, որի հետեւանքով հայկական կողմը ունեցել է հարյուրավոր զոհեր ու վիրավորները: Այդ հարձակման արդյունքում Արցախի իշխանությունները համաձայնել են ռուս խաղաղապահների առաջարկությանը՝ զինադադար հաստատելու, որով նախատեսվում է Արցախի ՊԲ զինաթափում, Արցախի Հանրապետության պետական մարմինների լուծարում եւ ինտեգրում Ադրբեջանին:
