Շաբաթ օրը արտահերթ խորհրդարանական ընտրություններ են անցկացվում Սլովակիայում, նախկին վարչապետ Ռոբերտ Ֆիցոն, որը ռուսամետ եւ հակաամերիկյան հայտարարություններ է անում, հանդես է եկել արեւմտամետ սկսնակի դեմ, տեղեկացրել է The Associated Press-ը։
59-ամյա նախկին վարչապետը եւ նրա «Smer» կուսակցությունը խոստացել են դադարեցնել Ուկրաինային Սլովակիայի ռազմական աջակցությունը, եթե իշխանություն վերադառնալու նրա փորձը հաջողվի։
«Smer»-ի գլխավոր մրցակիցը «Առաջադեմ Սլովակիա» լիբերալ կուսակցությունն է, որն ստեղծվել է 2017թ. եւ որը գլխավորում է 39-ամյա Միխալ Սիմեցկին։ Նա Եվրախորհրդարանի անդամ է։
Խոսելով մրցակցի մասին՝ Ֆիցոն շաբաթ օրն ասել է, որ կցանկանար, որ իր երկիրը չկառավարեին «սիրողական մակարդակի» մարդիկ քաղաքականությունում։
Ֆիցոն, որը վարչապետի պաշտոնը զբաղեցրել է 2006-2010 եւ 2012-2018թթ., կողմնակից չէ Ռուսաստանի դեմ ԵՄ պատժամիջոցներին, կասկածում է, թե արդյոք Ուկրաինան կկարողանա հետ մղել ռուսական զորքերը, եւ ցանկանում է արգելակել Ուկրաինայի մուտքը ՆԱՏՕ։
Նա առաջարկում է, որ Կիեւին զենք ուղարկելու փոխարեն ԵՄ-ն եւ ԱՄՆ-ն օգտագործեն իրենց ազդեցությունը, որպեսզի ստիպեն Ռուսաստանին եւ Ուկրաինային փոխզիջումային խաղաղ համաձայնագիր կնքել։
«Առաջադեմ Սլովակիա» կուսակցությունը, իր հերթին, երկրի ապագան տեսնում է ԵՄ-ին եւ ՆԱՏՕ-ին ամուր անդամակցության մեջ։
Կուսակցությունը խոստացել է շարունակել աջակցությունն Ուկրաինային։ Նա նաեւ կողմ է ԼԳԲՏ-հանրույթին, ինչը հազվադեպ բան է երկրի հիմնական կուսակցությունների շրջանում, երկիր, որը պահպանողական հռոմեական կաթոլիկության հենարանն է։
