Երեքշաբթի արևմտյան Նեպալի երկու երկրաշարժերի հետևանքով տուժել է 11 մարդ, ավերվել են տներ և ինչպես նաև սողանք է առաջացել, որը փակել է գլխավոր մայրուղին, հայտնում է Reuters-ը՝ վկայակոչելով կառավարության պաշտոնյաներին:
Հնդկաստանին սահմանակից Բաջհան թաղամասում 6,3 և 5,3 մագնիտուդ ուժգնությամբ երկրաշարժերի հետևանքով սողանքը փակել է հարավային հարթավայրեր տանող ճանապարհը, լրատվական գործակալությանը հայտնել է Ներքին գործերի նախարարության խոսնակ Ռամա Աչարյան։
Երկրաշարժերը, որոնք կենտրոնացած են եղել Թալկոտում և Չայնպուրում, տեղի են ունեցել մոտ 30 րոպե ընդմիջումով։
Դրանք զգացվել են նույնիսկ Հնդկաստանի մայրաքաղաք Նյու Դելիում, որտեղ մարդիկ դուրս են վազել իրենց տներից և գրասենյակային շենքերից։ Ավերածությունների մասին տեղեկություններ չկան։
Տասնմեկ մարդ՝ յոթ կին և չորս տղամարդ, տուժել են և բուժօգնություն են ստանում հիվանդանոցում, հայտնել է Բհարաթի ոստիկանության խոսնակ Բահադուր Շահը։ Նրա խոսքով՝ մեկ կին անհետացել է երկրաշարժի հետևանքով առաջացած մեկ այլ սողանքի մեջ հայտնվելուց հետո։
Շրջվարչակազմի ղեկավար Նարայան Պանդեյի խոսքով՝ վիրավորներից մեկին ընկնող առարկա է հարվածել։ Թաղամասում գտնվող Չայնպուր քաղաքում մի քանի տներ են փլուզվել։
