Ընդդիմության մեղադրանքը ՀՀ իշխանություններին հետեւյալն է՝ դուք չմիջամտեցիք: Այս մասին, այսօր՝ հոկտեմբերի 3-ին, Ազգային ժողովում հայտարարությունների ժամին ասաց ՀՀ ԱԺ ՔՊ խմբակցության պատգամավոր Վահագն Ալեքսանյանը:
«Ես ավելի պարզ փորձեմ ներկայացնել, թե ինչ է նշանակում այդ «չմիջամտեցիք»-ը: Դա նշանակում է, որ ՀՀ-ն չմտավ հենց իր ինքնիշխանության եւ առհասարակ գոյության դեմ լարված ծուղակի մեջ: Չմտավ Հայաստանը ռազմական գործողությունների մեջ, այդպիսով ՀԱՊԿ-ի կատարյալ անգործության պայմաններում չստանալով պոտենցիալ հարվածներ թե Ադրբեջանից, թե նրա դաշնակիցներից:
Մյուս մեղադրանքն այն է, որ ասում են՝ ամեն ինչ որոշվեց Պրահայում: Լավ էդ ռուսերեն տեքստերը, որ ձեզ տալիս են, որ թարգմանում եք, գոնե իմաստի վերծանում փորձո՞ւմ եք անել, թե՞ ինչ տալիս են, պետք է անպայման կարդաք:
Այսինքն Պրհայում գնացինք 1991-ին Գերագույն խորհրդով հաստատված մի փաստաթղթի հղում արեցինք ու վերջ, այ էդ ժամանակ այսպես եղավ: Բայց 1991-ին, երբ Ալա Աթայի հռչակագիրը ստորագրվում էր, այդ ժամանակ ոչ մի խնդիր չկար, հարցը չէր լոըւծվել: Այ երբ դրան հղում արեցինք, նոր էդ ժամանակ լուծվեց: Լավ, ինչքա՞ն կարելի է»,-ասաց նա:
Վահագն Ալեքսանյանը մեջբերում արեց ԽՍՀՄ ՊԱԿ-ի առաջին գլխավոր վարչության արտաքին հակահետախուզույան նախկին պետ գեներալ Կալուգինի «Spymaster» գրքից, որտեղ խոսվում էր ՊԱԿ-ի կողմից՝ Դաշնակցության մի շարք անդամների հավաքագրելու մասին։
«Բայց հայկական Դաշնակցությունը, այն խմբավորումն էր, որում մենք ամենաշատ գործակալների ներդրման գործողությունը կատարեցինք։ Դա ազգայնական խմբավորում էր և պայքարում էր Հայաստանի անկախության համար, բայց ժամանակի ընթացքում մենք այնքան գործակալներ ներդրեցինք այնտեղ, որ նրանցից ոմանք կարողացան հասնել ղեկավար պաշտոնների։
Մեզ հաջողվեց նեյտրալացնել խմբավորումը և 1980-ականներից արդեն խմբավորումը Սովետական Միության դեմ չէր պայքարում։ Կազմակերպությունը ամբողջությամբ և նրա մի շարք անդամներ հավաքագրված էին ԿԳԲ-ի կողմից»,- մեջբերեց Ալեքսանյանը՝ միաժամանակ հարց ուղղելով դաշնակցական պատգամավորներին։
«Հիմա հարց սիրելի՛ դաշնակցական ընկերներ, կոնկրետ ովքե՞ր են հավաքագրված։ Խնդրում եմ հավաքագրվածների ցուցակը ներկայացնել, որպեսզի հավաքական չանդրադառնամ, կոնկրետ հավաքագրվածներին անդրադառամ»,- ասաց Ալեքսանյանը։
