Ինչքան էլ ատոմակայանը շատ բարդ ենթակառուցվածք է, էներգետիկ կարեւոր կայան, բայց ատոմակայանների հետ կապված գործընթացները բավական պարզ ու հստակ են. այսինքն կան չափորոշիչներ, եւ կան խմբեր, մասնագետներ, որոնք պետք է փաստեն՝ յդ կայանը համապատասխանո՞ւմ է չափորշիչներին, թե ոչ, որից հետո կարող է որոշվել՝ այդ կայանը կաշխատի, թե ոչ: Այս մասին այսօր՝ հոկտեմբերի 4-ին, ԱԺ-ում հարցուպատասխանի ժամանակ նշեց ՀՀ ՏԿԵ նախարար Գնել Սանոսյանը՝ անդրադառնալով նրան, որ օրերս Թուրքիան պահանջել էր փակել Հայաստանի ատոմակայանը՝ վկայակոչելվ, որ այն անվտանգ չէ:
«Ես պետք է վստահեցնեմ, որ դեռեւս 1993-ից սկսած մեր ատոմակայանում իրականացվել եւ շարունակում են իրականացվել բազմաթիվ ծրագրեր, աշխատանքներ՝ ատոմակայանի անվտանգ եւ առկա միջազգային չափորոշիչներին բնորոշ կանոնակարգումներով աշխատանքն ապահովելու ուղղությամբ: Այս պահին մեր ատոմակայանն ունի մինչեւ 2026 թվականն աշխատելու լիցենզիա, որոշ ուղղություններով ունի մինչեւ 2031 թվականը աշխատելու լիցենզիա: Վերջերս կառավարությունն ընդունեց եւս մեկ որոշում առաջիկա տարիներին կիրականացվեն մի շարք աշխտանքներ, որոնք արդեն նախանշված են, որպեսզի ատոմակայանի աշխատանքի ժամկետը երկարացվի մինչեւ 2036 թվականը»,-ասաց Սանոսյանը:
«Ես մեկ-մեկ ասում եմ՝ մեր ատոմակայանում ամեն ինչ նոր է, բացի աշխատակիցներից: Աշխատակիցների պարագայում էլ, երեւի ճիշտ է, որ նոր չլինեն, այսինքն փորձառու, լավ մասնագետներ լինեն, որոնք տիրապետում են իրենց աշխատանքին»,-ընդգծեց նախարարը:
Նա հիշեցրեց, որ նախորդ տարի ՀՀ-ում հյուրընկալել են ԱԷՄԳ-ի ղեկավարին, շրջանց են իրականացրել ատոմակայանում: Նախարարն ընթերցեց ԱԷՄԳ-ի ղեկավարի խոսքը. «Ուրախ եմ տեսնել անվտանգության եւ հուսալիության գծով բարելավումները, որոնք կտարվել են կայանում: Տպավորված եմ կայանի աշխատակազմի նվիրված աշխատանքով»:
Սանոսյանը նաեւ տեղեկացրեց, որ հիմա աշխատանքներ են տանում նոր էներգաբլոկի կառուցման շուրջ. «Փորձում ենք ուսումնասիրել համաշխարհային փորձը, առկա տեխնոլոգիաները, մեր էներգետիկ համակարգի համապատասխանությունը առաջարկվող տարբերակներին: Այսինքն բավականին ակտիվ աշխատանք է տարվում, եւ մենք այդ լուծումները, կարծում եմ՝ հերթականությամբ կգտնենք»:
