Հայաստանի իշխանությունները մի անգամ ասացին. «Արցախը Հայաստան է, և վերջ»։ Դրանից հետո մենք կորցրինք Արցախը։ Աստված մի արասցե, որ իշխանությունները հայտարարեն, որ Սյունիքը Հայաստան է, և վերջ։ Այս մասին NEWS.am -ի թղթակցի հետ զրույցում ասել է քաղաքագետ Արթուր Խաչիկյանը։
«Մենք երբեք այսքան նվաստացած վիճակում չենք եղել։ Թուրքիան, Իրանը և Ադրբեջանը քննարկում են Հայաստանով անցնող միջանցքն՝ առանց Երևանի կարծիքը հաշվի առնելու։ 2020 թվականի նոյեմբերի 9-ի հայտարարությունը ոչնչացվեց, դրանից ոչինչ չմնաց։ Թուրքիան և Ադրբեջանը ագրեսիվ կերպով պահանջում են միջանցքներ, պարզվում է, դրանք առնվազն երկուսն են, և դրանք ոչ թե տրանսպորտային նշանակություն են ունենալու, այլ ռազմավարական։
Բացի այդ, ոչ պակաս ագրեսիվ կերպով պահանջում են Հայաստանի բնակեցումը 300 հազար ադրբեջանցիներով։ Նրանց կհետևեն ադրբեջանցի ոստիկանները։ Բացի այդ, պահանջում են փակել ատոմակայանը՝ ցանկանալով մեզ վերադարձնել քարե դար։ Բացի այդ, խոսում են Հայոց ցեղասպանությունից հրաժարվելու մասին»,- նշել է Խաչիկյանը։
Նա այս ամենը անվանել է Հայաստանի ոչնչացման ծրագիր։
«Սյունիքով անցնող միջանցքի բացումից հետո ադրբեջանցիները կդիմեն սադրանքների, որպեսզի առիթ ստանան զորք մտցնելու և Հայաստանի տարածքը գրավելու համար»,- ընդգծել է փորձագետը։
Նա համոզված է, որ Արևմուտքը շահագրգռված է միջանցքի բացմամբ, քանի որ Ադրբեջանը փաստացի միասնական է դառնում ՆԱՏՕ-ի անդամ Թուրքիայի հետ:
«Ինչո՞ւ Արեւմուտքը կարող է անվտանգության երաշխիքների մասին հայտարարել Ուկրաինայում, իսկ Հայաստանի դեպքում՝ ոչ։
Ինչ վերաբերում է Ռուսաստանին, ապա Ռուսաստանում հզոր ադրբեջանամետ և թուրքամետ լոբբին փորձում է Ռուսաստանի ղեկավարությանը համոզել, որ հայերի հետ գործ ունենալ հնարավոր չէ, և անհրաժեշտ է բանակցել Բաքվի և Անկարայի հետ։
Մենք ձախողել ենք բոլոր կապերը մի դաշնակցի հետ, որը մեզ դաշնակից չի համարում։ Արևմուտքը օգնություն չի ցուցաբերի, իսկ Իրանը ռազմական միջամտություն չի իրականացնի։ Հայաստանի իշխանությունները սպասարկում են օտարների շահերը՝ փորձելով հաճոյանալ Արևմուտքին, որը խոսքից բացի ոչինչ չի տալիս»,- եզրափակել է Խաչիկյանը։
