Մարգարայի անցակետի կառուցումը կարող է ավարտվել հաջորդ շաբաթ: Այս մասին այսօր՝ նոյեմբերի 17-ին, կառավարության նիստից հետո լրագրողների հետ զրույցում ասաց ՀՀ պետական եկամուտների կոմիտեի նախագահ Ռուստամ Բադասյանը։
«Անցակետը գրեթե պատրաստ է, միգուցե, մյուս շաբաթվա ընթացքում արդեն պարտաստ լինի, գրեթե աշխատանք չի մնացել»,- ասաց նա։
Բադասյանի խոսքով՝ որակի մասով հսկողություն է իրականացվում։
Նա պարզաբանեց, որ Մարգարայի անցակետի կառուցման համար մեկ անձից են գնում կատարել, որովհետև շտապողականության հարց է եղել, կարճ ժամկետում պետք է ավարտեին աշխատանքները։
ՊԵԿ նախագահը վստահեցրեց, որ մեկ անձից գնումը կոռուպցիոն ռիսկեր չի պարունակում։
Բադասյանի խոսքով՝ Հայաստան-Թուրքիա սահմանի բացման դեպքում բեռնատարների երթևեկության մասով համաձայնություն չի էլ եղել:
«Իհարկե, այդտեղ կա թե՛ դրական կողմ, թե՛ կարող է լինել որոշակի բացասական բայց, բնականաբար, բաց սահմաններ ունենալը շատ ավելի լավ է, քան փակ սահմաններ ունենալը. դա աքսիոմատիկ ճշմարտություն է»,- նկատեց ՊԵԿ նախագահը։
Հիշեցնենք՝ վարչապետ Նիկոլ Փաշինյանը հոկտեմբերի 30-ին հայտարարել էր, որ առաջիկայում Հայաստանի ու Թուրքիայի հատուկ ներկայացուցիչների միջև ձեռք բերված պայմանավորվածությունները կիրագործվեն։
«Հայաստան-Թուրքիա սահմանը բացվում է 3-րդ երկրների քաղաքացիների ու դիվանագիտական անձնագիր կրողների համար: Նաև ենթակառուցվածքային էական աշխատանք է արվել, մենք վերազինման ուղղությամբ աշխատել ենք Մարգարայի անցակետում ու այս առումով պատրաստ ենք զարգացումների։ Հույս ունենք՝ պայմանավորվածությունները կյանքի կկոչվեն», - ասել էր Փաշինյանը:
