Հայաստանի ՊՆ-ն այնքան տեղեկատվություն է տրամադրում, որքան անհրաժեշտ է ժողովրդին, որ տեղեկացված լինի, եւ այնքան, որ չխախտի մեր անվտանգային խնդիրները, մեր անվտանգային հարցերում խնդիրներ չառաջացնի: Այս մասին այսօր՝ փետրվարի 13-ին, ԱԺ-ում լրագրողների հետ զրույցում նշեց ԱԺ ՔՊ խմբակցության պատգամավոր Արմեն Խաչատրյանը՝ կոչ անելով հետեւել ՊՆ լրատվականին:
«Ես հորդորում եմ բոլոր համայնքաի ղեկավարներին, վարչական պատասխանատուներին ավելորդ տեղեկատվություն չտալ, մտքեր չտալ, խառը լուրեր չհայտնել, եւ բոլորս առաջնորդվենք ՊՆ-ի պաշտոնական տեղեկություններով: Այդքան բան»,-ասաց նա:
Պատգամավորը նկատեց, որ այսպիսի միջադեպեր եղել են եւ լինելու են, ուղղակի պետք է դրանք նվազագույնի հասցվեն. «Դրա համար մի շարք միջոցառումներ պետք է իրականացվեն, ինչը եւ արվում է, եւ քաղաքական, եւ դիվանագիտական, եւ ռազմական դաշտում; Խնդիրն այն է, որ այսպիսի դեպքերը էսկալացիայի չվերածվեն եւ շատ արագ ավարտվեն»:
Հարցին՝ ինչու հայկական կողմը պատրաստ չէ այնքան, որ զոհեր չունենանք, Արմեն Խաչատրյանը պատասխանեց. «Այդպիսի պատրաստություն չկա, որ մարտական գործողություններ վարվեն եւ դու երաշխիք ունենաս, որ զոհեր չես ունենալու: Նման երկիր չկա աշխարհում:
Սա սադրանք էր, դեռեւս ՊՆ-ի կողմից ծառայողական քննություն, գուցե նաեւ նախաքննություն կիրականացվի, թե ինչպես առաջացավ այս սադրանքը, այս գործողություններն ինչի պատճառ էին: Սա հետագայում կպարզվի: Ադրբեջանցիները լուր են տարածել, որի կապակցությամբ, կարծում եմ՝ ծառայողական քննություն է լինելու եւ բազմակողմանի վերլուծության արդյունքում օբյեկտիվ պատկերը ի հայտ կգա»:
Դիտարկմանը, որ այս ամենը ցույց է տալիս, որ Ադրբեջանն այնքան էլ տրամադրված չէ կայուն խաղաղության, ՔՊ-ակն պատգամավորն ասաց. «Վերջին 30 տարում երբեւէ տեսե՞լ եք, որ Ադրբեջանը սադրանքներ չանի: Իհարկե, անելու է: Եթե քաղաքական ձեռքբերումներ լինեն՝ խաղաղության պայմանագիր կամ փոխադարձ չհարձակվելու վերաբերյալ համաձայնագիր, այո, այդ դեպքում սադրանքները կհասցվեն նվազագույնի, պետք է հասցվեն: Բայց ինչ էլ լինի, մեր ԶՈՒ-ն պետք է պատրաստ լինի ցանկացած սադրանքի եւ հարձակման»:
Ավելի վաղ NEWS.am-ը հայտնել էր, որ այսօր ժամը 05:30-ից սկսած, Ադրբեջանի ԶՈՒ ստորաբաժանումները հրաձգային զենքերից կրակ էին բացել Ներքին Հանդի հատվածում տեղակայված հայկական դիրքերի ուղղությամբ, նախնական տվյալներով՝ հայկական կողմը հաղորդել էր 2 զոհի և վիրավորների մասին։ Ժամը 09:30-ի դրությամբ կրակը դադարել է։
Բաքուն հաղորդել է, թե «Հատուցում» գործողություն են իրականացրել՝«ի պատասխան հայկական զինված ուժերի երեկվա սադրանքի»։
Երեկ ադրբեջանական կողմը հաղորդել էր Զանգելանի շրջանի դիրքերի ուղղությամբ Հայաստանի Զինված ուժերի կրակ բացելու մասին՝ պնդելով, թե կրակի հետևանքով ադրբեջանցի սահմանապահ է վիրավորվել: Երևանն էլ արձագանքել էր՝ քննում է հայաստանցի դիրքապահների կողմից կրակ բացելու մասին տեղեկությունը։
