News
Լրահոս
News
Ուրբաթ
Ապրիլ 19
Տեսնել լրահոսը


Կոտայքի մարզի Կամարիս գյուղում արդեն մոտ հազար գլուխ խոզ է անկել։ Այս մասին NEWS.am-ին պատմեց գյուղի ֆերմերներից Արարատ Դանիելյանը։

6 տարի առաջ Արարատ Դանիելյանը որոշեց ֆերմա հիմնել՝ խոզաբուծությունը վերածելով ամբողջ օրվա միակ զբաղմունքը, իսկ այժմ ֆերման դատարկ է, 130-ից ավելի խոզ է անկել՝ առայժմ անհայտ հիվանդությունից․

«Սա միայն իմ մոտ չէ, սա ամբողջ մարզում է, Հանրապետությունում է այս հիվանդությունը։ Սննդի տեսչությունից եկել, արձանագրել են, թույլ չեն տվել միսը ծախել ու այդ միսը չէինք էլ կարող ծախել, որովհետեւ այդ միսը սեւ գույնի է լինում»։

Ֆերմեր Արարատն այժմ 23 միլիոն դրամի տույժ ունի, չգիտի՝ ինչպե՞ս է հոգալու այդ ծախսերն ու մարելու մեծ թվով վարկերը․ «Էս ամեն ինչը վարկերով ենք արել, ես ուղղակի խնդրում եմ, որ վարկերիս հարցերը լուծեն։ Դեպքի առնչությամբ ֆերմերի հետ ոչ Էկոնոմիկայի նախարարությունից, եւ ոչ էլ մարզպետարանից չեն այցելել, չեն քննարկել խնդիրը»։

Ֆերմերները պատմեցին, որ ընդամենը 30 խոզ է մնացել գյուղում, հիվանդությունը չի նահանջում, եւ արդեն հազարից ավելի խոզ անկել է։

«Աֆրիկյան ժանտա՞խտ» է սա, թե՞ այլ հիվանդություն, ֆերմերները կասկածներ ունեն, որ Սննդամթերքի անվտանգության տեսչական մարմինը կարող է թաքցնել փորձաքննության իրական արդյունքները․ «Հիմա Սննդի տեսչությունից եկել ու տարել են անալիզի, բայց արդեն գլխանց ասում են՝ էդ հիվանդությունը չի, բայց անասնաբույժներն ասում են, որ այդ հիվանդությունն է»։

Ֆերմեր Վարուժան Ներսիսյանը 2 տարի է՝ ինչ զբաղվում է խոզաբուծությամբ, մոտ 60 խոզ ուներ, բոլորն էլ անկել են՝ իրենց հետ հողի տակ տանելով ներդրած գումարները․ «Լրիվ սատկել են, ամբողջ գումարը հողի տակն է։ Ես փաստեր ունեմ, նկարել ենք, որ մարդիկ չասեն՝ սուտ ես ասում։ Մենք խնդրում ենք կառավարությունից, որ աջակցեն, մենք էդքան գումար ենք լցրել հողի տակ»։

Գյուղի անասնաբույժ Արամ Գեւորգյանը 36 տարվա իր պրակտիկայում մեկ անգամ էլ հանդիպել է «Աֆրիկյան ժանտախտի» դեպքին, NEWS.am-ի հետ զրույցում ասաց, որ խոզերի կլինիկական նշանները նույնն են եղել, ինչ այս անգամ է․

«Կլինիկական նշանների հիման վրա կասկածներ ունենք, որ այն կարող է լինել ժանտախտ։ Դասական ժանտախտի ժամանակ էլ նույն նշաններն են լինում։ Ինքը կերից հրաժարվում է, ականջի կողքերը թեթեւակի կապտություն է նկատվում, հետո դա շարունակվում է, սկսում է ճոճվելով քայլել, չի կենտրոնանում, քանի որ արյունն արդեն խտանում է, արդեն չի կարողանում կենտրոնանալ»։

Անասնաբույժի խոսքով՝ «Աֆրիկյան ժանտախտ» հիվանդությունը միայն խոզերի շրջանում է տարածվում, այն մարդկանց չի փոխանցվում։

ՍԱՏՄ Իրազեկման, խորհրդատվության եվ հանրության հետ տարվող աշխատանքների բաժին պետ Անուշ Հարությունյանը մեզ հետ զրույցում նշեց, որ փորձաքննության արդյունքներն առայժմ հայտնի չեն, թե երբ կլինեն, առայժմ անորոշ է։ ՍԱՏՄ-ում շուրջ 200 խոզի անկման դեպք է միայն արձանագրվել․ «Եթե կան դեպքեր, ես առաջարկում եմ գյուղացիներին՝ մեզ անպայման տեղեկացնել։ Մոտ 200-ից պակաս խոզ է անկել։ 1000-ը թաքցնել հնարավոր չէ»։

Անուշ Հարությունյանը տեղեկացրեց՝ տեսուչները հետեւել են, որ անկած կենդանիները թաղվեն սահմանված ընթացակարգով: Միայն լաբորատոր փորձաքննության արդյունքներով հստակ կլինի կենդանիների անկման պատճառը։ 

!
Այս նյութը հասանելի է նաև   Русский
Տպել
Ամենաշատ