News
Լրահոս
News
Շաբաթ
Հուլիս 13
Տեսնել լրահոսը

2023-ին Երևանի քաղաքապետարանի բյուջեի շրջանակում նախատեսված 1 մլրդ 102 մլն 297 հազար դրամից 991 մլն 234 հազար դրամը տրամադրվել է ջրահեռացման, կոմունիկացիոն ցանցերի կառուցմանը՝ 283 մլն 506 հազարով ավելի, քան 2022 թվականին էր: Այսինքն՝ 89,9 տոկոս կատարողականով 2023-ին իրականացվել են հեղեղատար համակարգերի կառուցման աշխատանքներ: Սակայն վերջին շրջանի անձրևները կաթվածահար արեցին քաղաքը, քանի որ միլիոններ արժեցող ջրահեռացման համակարգը պատրաստ չէր կատարել իր գործը, որի հետևանքով բազմաթիվ քաղաքացիների գույք վնասվեց, մասնավորապես՝ մեքենաներ, որոնք հայտնվեցին ջրի տակ: Այդ մասին Երևանի ավագանու՝ հունիսի 25-ի նիստին ասաց «Մայր Հայաստան» խմբակցության անդամ Աննա Ավետիսյանը՝ խնդրելով պարզաբանել, թե ինչու է թերակատարվել ջրահեռացման համակարգի կատարողականը, ինչու չի գործել այդքան թանկ արժեցող համակարգը:

Երևանի քաղաքապետի խորհրդական Կամո Արեյանն արձագանքեց՝ տողը եղել է «ջրահեռացում», բայց ծախսվել է կոյուղատար համակարգի վրա, այսինքն՝ ոչ թե հեղեղատար համակարգի վրա է դրվել գումարը, այլ կոյուղատար ցանցի վերակառուցման, թարմացման և նորի կառուցման:

«Այո՛, Երևան քաղաքի մակերևութային ջրերի հեղեղատար և անձրևընդունիչ համակարգը կատարյալ չէ: Այսօր գործող 167 կիլոմետրն է: Հանձնված է «Վեոլիա ջուր» ընկերությանը՝ վարձակալության պայմանագրով շահագործման»,- ասաց Արեյանը և նշեց, որ Տիգրան Ավինյանի հանձնարարությամբ մայրաքաղաքում կատարվել է ուսումնասիրություն, ավարտվել է գույքագրումը, և արդյունքը պետք է ներկայացվի Կառավարությանն ու դոնոր աղբյուրներին, որպեսզի կառուցվի նոր հեղեղատար համակարգ:

Գույքագրման արդյունքում պարզվել է, որ կան թաղամասեր, որոնք չունեն հեղեղատար համակարգ, ի սկզբանե կառուցված չի եղել: Կան նաև վերակառուցման ենթակա համակարգեր, քանի որ նոր կառուցապատումները հեղեղատար համակարգերի ծավալների ընդլայնման անհրաժեշտություն են առաջացրել:

«Ինչքան քաղաքը բարեկարգվում և կառուցապատվում է, այնքան մեծանում է մակերևութային ջրերի ծավալը, որովհետև գրունտը քաշում է հողն իր մեջ: Նոր կառուցապատումները, ասֆալտապատումը, սալիկապատումը բերում են մակերևութային ջրերի ծավալի ավելացում, ինչն էլ հանգեցնելու է նոր հեղեղատար համակարգի կառուցման անհրաժեշտության: Օրինակ՝ 4 խաչմերուկ է հիմա քանդվում Տերյան փողոցի երկարությամբ՝ Ագրարային համալսարանի մոտից մինչև Թումանյան փողոց, վերևի բնակելի համալիրի մակերևութային ջրերը անձրևընդունիչ ցանց ընդունելու համար»,- ասաց նա:

Ինչ վերաբերում է վերջին հեղեղումներին, Արեյանը նշեց՝ տեղումները նորմայից բարձր էին, անձրևընդունիչ համակարգը չէր կարող այդքան ծավալն ընդուներ:

«Մենք ունենք շատ փոքր ծավալի անջատ հեղեղատար համակարգ, մեր համակարգը կիսանջատ է, այսինքն՝ այն միացված է նաև կոյուղատար համակարգին, և մեծ ծավալի անձրևների դեպքում բերում է ծանրաբեռնվածության և կարող է հանգեցնել մակերևութային ջրերի ծավալի աճի փողոցներում: Այնպես որ, այս համակարգը լուրջ ներդրման և վերակառուցման կարիք ունի»,- ասաց Արեյանը:

Երևանի քաղաքապետ Տիգրան Ավինյանը հավելեց, որ տվյալ ոլորտում տարիներ շարունակ քաղաքապետարանը խոշոր ծրագրեր չի իրականացրել, աշխատանքը սկսվել է 2022-23 թթ.-ից, և սկսել են այն թաղամասերից, որտեղ առհասարակ համակարգ չկա. օրինակը Մուշավան թաղամասն է:

«Կառավարության գործընկերների հետ քննարկել ենք առհասարակ պայմանագրային պայմանների վերանայումը «Վեոլիա ջուր» ընկերության հետ, որը հնարավորություն կտա այդ ընկերությանը վարձավճարների փոխարեն, որը տալիս է Կառավարությունն ամբողջ ենթակառուցվածքների օգտագործման համար, այդ գումարներն ուղղել ներդրումներին, և սա էականորեն կմեղմի այն խնդիրները, որոնց մասին խոսում ենք, եթե, իհարկե, ֆորսմաժորի մասին չէ խոսքը, որովհետև այդ նույն ֆորսմաժորն ամենազարգացած ենթակառուցվածքով ԱՄԷ-ում էր տեղի ունեցել, և իրենք էլ դրա դեմ պայքարելու մեթոդ չունեն: Աշխարհում դեռևս նմանատիպ ոչ մի ֆորսմաժորի դեպքում պայքարի մեթոդը չի գտնվել»,- ասաց քաղաքապետը:

!
Այս նյութը հասանելի է նաև   Русский
Տպել
Ամենաշատ
Ֆոտոռեպորտաժներ