նախընտրելի դարձնելՀրադադարի մոնիտորինգի մեխանիզմ ստեղծելու համար անհրաժեշտ է, որ դա ցանկանա նաև Ադրբեջանը։ Այս մեխանիզմները գործում են, եթե պարում ես արգենտինական տանգո, բայց եթե միայնակ ես պարում, դա անարդյունավետ կլինի։ Դրա մասին NEWS.am -ի թղթակցի հետ զրույցում հայտարարել է Հայաստանում հետախուզադիվերսիոն առաջին ջոկատի հիմնադիր, ազատամարտիկ, «Ողջ մնալու արվեստ» (ՈՄԱ) կազմակերպության ղեկավար Վովա Վարդանովը
«Մենք կարող ենք դիմակայել ուզածդ ագրեսիայի, եթե պետական կառույցները, ներառյալ անվտանգության ուժերը, ըմբռնեն, որ առանց հասարակության մասնակցության իրենք անզոր են:
Հիմնական հարցերի շուրջ պետք է կոնսենսուս լինի։ Անվտանգության խնդիրը դրանցից մեկն է։ Հայաստանի քաղաքացիների կյանքը պետք է դառնա գլխավոր արժեքը։ Եթե սկսում են դրանով չառաջնորդվել, նռնակ են նետում մարդկանց վրա կամ հասարակական կազմակերպությանը թույլ չեն տալիս Ոսկեպարում ու Կիրանցում բարձրացնել անվտանգության մակարդակը։
Ինչո՞ւ այս տարածքների հանձնումից առաջ անվտանգության հարցերը նախապես չեն լուծվել։ Եթե նահանջում ես արդեն պատրաստված դիրքեր, իրավիճակը քեզ համար շատ ավելի նպաստավոր է դառնում։ Բայց չնայած խոչընդոտներին, բոլորիս հաջողվել է ինչ-որ բան անել, և ամեն ինչ այնքան էլ վատ չէ, քան կարող էր լինել։ Միգուցե «Գմբեթի» դեմ պայքարը նրա համար էր, որ Ոսկեպար և Կիրանց գյուղերն անպաշտպա՞ն մնան, և այնտեղ դժգոհությունը բերի ինչ-որ տեղաշարժի, իսկ հետո՝ իշխանափոխության և, հնարավոր է, քաղաքացիական պատերազմի՞»։
Վարդանովը կոչ արեց հետաքննել ու պարզել, թե ով է այս երկրի բարեկամը, իսկ ով է ամեն գնով ուզում իշխանության գալ, թեկուզ՝ պետությունը կործանելու գնով։
«Ո՞ւմ են նշանակում Հայաստանի զինված ուժերի գլխավոր շտաբի ինժեներական զորքերի վարչության պետի պաշտոնում։ Միգուցե նրան, որը տապալեց Արցախի երկրորդ պաշտպանական գծի կառուցումը 2020 թվականին։ Խոսքը Կարեն Գրիգորյանի մասին է։
Երկրի ղեկավարությունը չի՞ հասկանում, թե ինչ է կատարվում։ Եթե չի հասկանում, ուրեմն այդ իշխանությունը պետք է հեռանա: Եթե հասկանում է, ապա ինչո՞ւ է նման մարդկանց պահում նման պաշտոններում։
Դիրքերն անօդաչու թռչող սարքերի հարձակումներից պաշտպանելու համար ամրությունների կառուցման մրցույթ դեռ չի հայտարարվել։ Մեր տեխնիկան դեռևս ստորգետնյա ապաստարաններ չունի։ Ջերմուկում դիրքերը նույն վիճակում են, ինչ 2022 թվականին։
Քանի դեռ հակառակորդին զսպելու իրական մեխանիզմներ չկան, ինժեներական աշխատանքների ժամանակ նա կրակելու է քո ուղղությամբ։ Ուստի հիմա անհրաժեշտ է ուժեղացնել պաշտպանության երկրորդ գիծը։ Ինչո՞ւ համապատասխան կառույցները չեն կառուցում այդ երկրորդ գիծը»,- հավելել է Վովա Վարդանովը։
Նրա համոզմամբ՝ հասարակության զգալի հատվածը, իշխանություններն ու ընդդիմությունը զբաղված են ինքնախաբեությամբ՝ անհեռատես և ինքնասպան պահվածք դրսևորելով։
