Բրյուսելում, այսօր`նոյեմբերի 25-ին, տեղի է ունեցել Հայաստան-Եվրոպական Միություն համագործակցության խորհրդի 12-րդ նիստը, որին մասնակցելու նպատակով Բրյուսել էր ժամանել Հայաստանի պատվիրակությունը ԱԳ նախարար Էդվարդ Նալբանդյանի գլխավորությամբ:
ԱԳՆ մամուլի ծառայությունից NEWS.am-ին հայտնում են, որ ԵՄ պատվիրակությունը գլխավորում էին ԵՄ նախագահությունը ներկայացնող Լեհաստանի ԱԳ պետքարտուղար Միկոլայ Դովգիլեւիչը եւ Եվրահանձնաժողովի Եվրոպական հարեւանության քաղաքականության եւ ընդլայնման հարցերով հանձնակատար Շտեֆան Ֆյուլեն:
Նիստին ամփոփվել են այս տարվա ընթացքում կատարված աշխատանքները, անդրադարձ է արվել հարաբերությունների զարգացման նպատակով ձեռնարկվելիք քայլերին, ինչպես նաեւ տարածաշրջանային հարցերին:
Լեհաստանի արտաքին գործերի պետքարտուղար Միկոլայ Դովգիլիեւչը եւ հանձնակատար Շտեֆան Ֆյուլեն բարձր են գնահատել ԵՄ-Հայաստան հարաբերություններում արձանագրված առաջընթացը:
ԱԳՆ ղեկավարը կարեւորել է Հայաստանում բարեփոխումների գործընթացին աջակցող ԵՄ խորհրդատուների խմբի գործունեությունը` այն բնորոշելով որպես արդյունավետ համագործակցության հաջողված օրինակ:
Խորհրդի նիստի ընթացքում կողմերը մտքեր են փոխանակել Ասոցացման համաձայնագրի կնքման նպատակով վարվող բանակցությունների, խորը եւ համապարփակ ազատ առեւտրի գոտու ստեղծման, մուտքի արտոնագրային ռեժիմի դյուրացման գործընթացի, համագործակցության խորհրդարանական ձեւաչափերի շուրջ:
Կողմերը քննարկել են հաջորդ տարվա առաջին կեսին Խորը եւ համապարփակ ազատ առեւտրի գոտու ստեղծման շուրջ բանակցությունների մեկնարկի հնարավորությունը:
Նախարար Նալբանդյանն ընդգծել է, որ Հայաստանն ավարտել է մուտքի արտոնագրային ռեժիմի դյուրացման վերաբերյալ բանակցությունների մեկնարկի նախապատրաստական աշխատանքները եւ համապատասխան քայլեր է սպասում Եվրոպական կողմից: Միկոլայ Դովգիլեւչը հավատացրել է, որ մինչեւ լեհական նախագահության ավարտը Եվրահանձնաժողովի կողմից մուտքի արտոնագրային ռեժիմի դյուրացման վերաբերյալ բանակցությունների մեկնարկի տրված մանդատը կհաստատվի Եվրոպական խորհրդի կողմից:
Խորհրդի նիստին հաջորդեց Էդվարդ Նալբանդյանի, Միկոլայ Դովգիլեւիչի եւ Շտեֆան Ֆյուլեի համատեղ ճեպազրույցը լրագրողների հետ: