Կիպրաթուրքերի առաջնորդ Էրսին Թաթարը նպատակահարմար չի համարում ՄԱԿ-ի գլխավոր քարտուղար Անտոնիո Գուտերեշի և կիպրահույների առաջնորդ Նիկոս Խրիստոդուլիդեսի հետ Կիպրոսի խնդրի վերաբերյալ եռակողմ հանդիպում անցկացնելը և հայտնում, որ կազմակերպության գլխավոր քարտուղարից նման հրավեր չի ստացվել։ Այս մասին տեղեկացնում է Kibris թերթը։
«ՄԱԿ-ի գլխավոր քարտուղար Գուտերեշից եռակողմ հանդիպման ոչ մի հրավեր չկա։ Մենք հավանություն չենք տալիս դրա անցկացմանը ներկա պայմաններում։ Նման հանդիպման համար հիմքեր չկան»,- Հյուսիսային Կիպրոսի չճանաչված թուրքական հանրապետության նախագահի խոսքն է մեջբերում պարբերականը։
«Բանակցությունները չեն կարող սկսվել այնքան ժամանակ, քանի դեռ չի գրանցվել մեր ինքնիշխան հավասարությունը և հավասար միջազգային կարգավիճակը»,- նշել է նա։ Ըստ նրա, «կիպրահույների մտադրությունն է [բարենպաստ] տպավորություն թողնել և փորձել ճնշում գործադրել թուրքական կողմի վրա»։ «Մենք նման խաղերի չենք մասնակցում»,- ընդգծել է նա։
Ըստ Թաթարի, կղզու խնդրի լուծման որոնումը դաշնային հիմունքներով ավարտվել է 2017 թվականի Կրան Մոնտանայում խզված բանակցություններով, ուստի կիպրաթուրքական կողմը մտադիր չէ դրանք վերսկսել։ «Քանի որ ակնհայտ է, որ [կողմերը] ընդհանուր տեսակետ չունեն, ուստի եռակողմ կամ որևէ այլ ձևաչափով հանդիպման կարիք չկա»,- եզրափակել է նա։
Շաբաթ երեկոյան Կիպրոսի Հանրապետության նախագահ Նիկոս Խրիստոդուլիդեսն ասել էր, որ Գուտերեշը Կիպրոսի համայնքների ղեկավարներին հրավիրել է կղզու խնդրի կարգավորման վերաբերյալ եռակողմ հանդիպման, որը նախատեսված է օգոստոսի 13-ին Նյու Յորքում: Նախագահը հայտարարել էր, որ ընդունել է այդ հրավերը։
