ԱՄՆ պետքարտուղար Էնթոնի Բլինքենը G7-ի ԱԳՆ ղեկավարներին տեղեկացրել է, որ Իրանը եւ շիական «Հեզբոլլահ» շարժումը կարող են գրոհ սկսել Իսրայելի դեմ առաջիկա 24 ժամվա ընթացքում։ Այս մասին տեղեկացրել է Axios պորտալը՝ հղում կատարելով աղբյուրներին։
Նրանց տեղեկացմամբ՝ Բլինքենը հեռախոսազրույց է ունեցել «յոթնյակի» գործընկերների հետ, որպեսզի փորձի դիվանագիտական ճնշում գործադրել Իրանի եւ «Հեզբոլլահի» վրա՝ նվազագույնի հասցնելու համար նրանց հարվածի ուժը, որը պետք է լինի Թեհրանում պաղեստինյան ՀԱՄԱՍ շարժման քաղբյուրոյի ղեկավար Իսմայիլ Հանիեի սպանության պատասխանը։ ԱՄՆ պետքարտուղարն ընդգծել է, որ հնարավոր գրոհի հետեւանքների մեղմումը տարածաշրջանում լիածավալ պատերազմի կանխման լավագույն ուղին կլիներ։
Աղբյուրները տեղեկացրել են, որ Բլինքենը համոզված է, որ Իրանը եւ «Հեզբոլլահը» կհարվածեն հրեական պետությանը, սակայն հայտնի չէ, թե կոնկրետ ինչպիսին կլինի այդ քայլը։ Նա նշել է, որ ԱՄՆ-ը այդ գրոհի սահմանափակման եւ հնարավոր պատասխանի մեղմման փորձեր է ձեռնարկում։
Պարբերականի զրուցակիցների խոսքով՝ ամերիկյան արտաքին քաղաքական գերատեսչության ղեկավարը հուսահատություն է հայտնել այն առումով, թե ինչ ազդեցություն է ունեցել մերձավորարեւելյան հակամարտության սրումը Գազայի հատվածում հրադադարի բանակցությունների վրա։ Բլինքենը հայտնել է, որ ամերիկյան վարչակազմը մինչեւ Հանիեի սպանությունը զգում էր, որ կողմերը, ինչպես երբեք, մոտ են գործարքի կնքմանը։
