Ռիկսդագի Շվեդիա-Հայաստան բարեկամության խումբը ողջունել է ԵՄ Խորհրդի ընդունած որոշումները Հայաստանին Խաղաղության եվրոպական հիմնադրամից օգնություն ցուցաբերելու եւ ԵՄ-ի հետ վիզային ռեժիմի ազատականացման երկխոսություն սկսելու վերաբերյալ, այս մասին տեղեկացրել է Շվեդիա-Հայաստան բարեկամության խմբի անդամ, Շվեդիայի խորհրդարանի պատգամավոր Էրիկ Հելսբորնը՝ հայտարարությունը հրապարակելով X-ի իր միկրոբլոգում։
Անդրադառնալով վերոնշյալ որոշումներին, որոնք ընդունել է ԵՄ Խորհուրդը հուլիսի 22-ին, նա նշել է, որ այդ որոշումները շատ կարեւոր փուլ են Հայաստան-ԵՄ գործընկերությունում՝ հիմնված ընդհանուր արժեքների, սկզբունքնների եւ ապագա բարգավաճման տեսլականի վրա։
«Մենք՝ Ռիկսդագի Շվեդիա-Հայաստան բարեկամության խմբի անդամներս, ողջունում ենք ԵՄ Խորհրդի որոշումները եւ ընդգծում ենք Շվեդիայի աջակցությունը Հայաստան-ԵՄ գործընկերության խորացմանը, ինչպես նաեւ ԵՄ պարտավորությանը՝ շարունակել օժանդակություն ցուցաբերել Հայաստանին»,- նշված է հայտարարությունում։
