Ֆոնդային շուկաներն անկում են ապրում։ Ասիա-խաղաղօվկիանոսյան տարածաշրջանի ֆոնդային բորսաներում առևտուրը սկսվել է ինդեքսների կտրուկ անկմամբ։

Ճապոնական Nikkei 225 ֆոնդային ինդեքսը երկուշաբթի անկում է ապրել 12,4%-ով, քանի որ ներդրողները անհանգստացած են ԱՄՆ-ի տնտեսության վիճակով և մեծացրել են մտահոգությունները հնարավոր ռեցեսիայի վերաբերյալ, հայտնում է Euronews-ը։ Ինչ-որ պահի հենանիշային ինդեքսն ընկել է 13,4%-ով, ինչը 1987 թվականից ի վեր ամենամեծ անկումն է:

Գրեթե բոլոր բաժնետոմսերը վաճառվում են մինուսով: Ավելի լայն TOPIX ինդեքսը նվազել է 12,8%-ով, քանի որ կեսօրից հետո վաճառքներն ակտիվացել են: Թայվանի Taiex-ը նվազել է 8,4%-ով, իսկ կորեական Kospi-ի ինդեքսը՝ 8%-ով: Kospi և TOPIX բորսաներում առևտուրը դադարեցվել է։

Հոնկոնգի հիմնական Hang Seng ինդեքսը, որը հետևում է 30 խոշորագույն տեխնոլոգիական ընկերությունների բաժնետոմսերին, ընկել է 1,53%-ով։ Կրիպտոարժույթների շուկայում բիթքոյնի արժեքը նվազել է 18%-ով։ Փլուզումն ազդել է տեխնոլոգիական ընկերությունների բաժնետոմսերի վրա:

Ճապոնական շուկաները ամենաշատն են տուժել, քանի որ անցյալ շաբաթ Ճապոնիայի բանկը բարձրացրել է տոկոսադրույքները, իսկ իենը կտրուկ աճել է: Գործոններից մեկը, որը դրդեց Ճապոնիայի բանկին բարձրացնել տոկոսադրույքները, ճապոնական իենի երկարատև թուլացումն էր, որը գնաճը բարձրացրեց կենտրոնական բանկի 2% թիրախից:

Ֆինանսական շուկաները սկսեցին ընկնել ուրբաթ օրը և արձագանքում են շաբաթվա վերջին հրապարակված զեկույցին, որը ցույց է տալիս, որ ԱՄՆ գործատուների շրջանում զբաղվածության աճն անցյալ ամիս դանդաղել է: Ներդրողները մտավախություն ունեն, որ բարձր տոկոսադրույքները, որոնք նախատեսված են գնաճը զսպելու համար, կարող են ԱՄՆ տնտեսությունը մղել դեպի ռեցեսիա:

Համաշխարհային վաճառքի պայմաններում եվրոպական ֆոնդային շուկաները երկուշաբթի բացվում են ցածր մակարդակով: Սպասվում է, որ ԱՄՆ ֆոնդային շուկան անկում կունենա։ Ստամբուլի ֆոնդային բորսան դադարեցրել է առևտուրը։