Պաղեստինյան ՀԱՄԱՍ շարժման կողմնակիցները պնդում են, որ Իրանի արտաքին գործերի պաշտոնակատար Ալի Բաղերի Քանին տեղեկացրել է իրենց իր երկրի ղեկավարության մտադրության մասին՝ վճռական պատասխան տալ Իսրայելին Թեհրանում շարժման քաղբյուրոյի ղեկավար Իսմայիլ Հանիեի սպանության համար։ Համապատասխան հայտարարությունը հրապարակվել է արմատականների պաշտոնական թելեգրամ-ալիքում։
«Իրանի արտաքին գործերի պաշտոնակատարը ցավակցություններ է հայտնել Թեհրանում ՀԱՄԱՍ-ի ներկայացուցիչներին [Հանիեի սպանության առիթով] եւ հաստատել, որ իր երկրի ղեկավարությունը պատրաստ է վճռական պատասխան տալ այս համատեքստում»,- նշված է փաստաթղթում։ Ավելացվել է, որ Բաղերի Քանին շարժման առաջնորդի սպանությունն անվանել է միջազգային իրավունքի նորմերի խախտում եւ հայտնել է, որ իսլամական հանրապետության իշխանություններն արդեն որոշում են կայացրել պատասխան հարվածի ժամանակի եւ մասշտաբների մասին։ Իրանի արտաքին գործերի պաշտոնակատարը նաեւ ընդգծել է, որ Թեհրանը, հավաստիացնում են արմատականները, դիտարկում է Իսրայելին հասցվելիք պոտենցիալ հարվածը՝ ի պատասխան Հանիեի սպանության առաջին հերթին որպես ինքնապաշտպանության իրենց իրավունքի իրականացում։
Երկուշաբթի իսլամական հանրապետության ԱԳՆ պաշտոնական ներկայացուցիչ Նասեր Քանաանին իր ամենշաբաթյա մամուլի ասուլիսում հայտարարել է, որ Իրանի հավաքած բոլոր ապացույցները մատնանշում են, որ Հանիեի սպանության հետեւում կանգնած է Իսրայելը։ Թեհրանը շահագրգռված չէ ավելացնել լարվածությունը Մերձավոր Արեւելքում, եւ անկայունության աղբյուրը տարածաշրջանում, Իրանի իշխանությունների կարծիքով, հենց հրեական պետությունն է։
