Հնդկաստան-Բանգլադեշ առևտուրն ամբողջությամբ դադարեցվել է Բանգլադեշի նախկին վարչապետ Շեյխ Հասինայի հրաժարականից հետո քաղաքական ճգնաժամի պայմաններում։ Դրա մասին ТАСС-ին հայտնել է Հնդկաստանի արտահանման կազմակերպությունների ֆեդերացիայի (FIEO) նախագահ Աշվանի Կումարը։
«Առևտուրն ամբողջությամբ դադարեցվել է օգոստոսի 5-ից, թեև վերջին 15 օրվա ընթացքում արդեն եղել են առանձին խափանումներ»,-ասել է Կումարը:
Միաժամանակ նա նշել է, որ Բանգլադեշի գործընկերները հույս ունեն վերսկսել գործունեությունը մեկ շաբաթվա ընթացքում։ «Բանգլադեշից ներկրողների արձագանքները հուսադրող են, քանի որ նրանք ակնկալում են, որ իրավիճակը մոտ մեկ շաբաթվա ընթացքում կկարգավորվի», - ասել է FIEO-ի նախագահը: Ըստ նրա՝ առևտրի ներկա խափանումների պատճառով արագ փչացող ապրանքների արտահանումը կարող է տուժել։
Կումարը հիշեցրել է, որ 2023-2024 թվականներին Հնդկաստանի արտահանումը Բանգլադեշ կազմել է 11 միլիարդ դոլար: Բանգլադեշից հնդկական ներմուծման մեջ գերակշռում էին հագուստը, տեքստիլը, կաշվե իրերը, անասնակերը և ձկները:
Օգոստոսի 5-ին, զանգվածային հակակառավարական ցույցերի պայմաններում, Բանգլադեշի վարչապետ Շեյխ Հասինան հրաժարական տվեց և լքեց երկիրը։ Որոշում է ընդունվել ձևավորել ժամանակավոր կառավարություն. Օգոստոսի 6-ին ժամանակավոր կառավարության ղեկավար է նշանակվել Խաղաղության Նոբելյան մրցանակի դափնեկիր Մուհամմադ Յունուսը։ Երկրի մի շարք քաղաքներում հակակառավարական ցույցերից հետո անկարգությունները շարունակվում են։ Ցուցարարների մեծ մասը երիտասարդ ուսանողներ էին, որոնք դժգոհ էին գործազրկության բարձր մակարդակից և հեռանկարների բացակայությունից։
