Կուրսկի շրջան ներխուժած ուկրաինական բանակը չորեքշաբթի կեսօրից հետո գրավել է «Սուջա» գազաչափ կայանը, որով ռուսական գազը մղվում է Եվրոպա։
«Սուջա»-ն՝ «Գազպրոմ»-ին Ուկրաինայի տարածքով գազ մղելու միակ կետը Մոսկվայի ժամանակով 13:00-ի դրությամբ հայտնվել է Ուկրաինայի զինված ուժերի վերահսկողության տակ, հայտնում է «Рыбарь»-ի թելեգրամյան ալիքը։ Ըստ այլ աղբյուրների՝ Սուջա քաղաքն ինքը հայտնվել է օպերատիվ շրջափակման մեջ. այնտեղ գտնվում են պաշտպանության նախարարության զորքերն ու ԱԴԾ-ի ուժերը։
Սուջայի անցակետի անօդաչու սարքերի լուսանկարները ցույց են տալիս հրետակոծության հետքեր և վնասված տանկ: «Գազպրոմ» կայանը անցակետի մոտակայքում է, գրում է «Рыбарь»-ը։ Նշվում է, որ օրվա սկզբից ուկրաինական զորքերին հաջողվել է ևս 3 կմ-ով ավելի խորանալ Կուրսկի շրջանում, իսկ Օբուխովկան, Պոկրովսկոյեն, Տոլստի Լուգը և Լյուբիմովկան անցել են նրանց վերահսկողության տակ։
«Սուջա» կայանի միջոցով «Գազպրոմ»-ն ամեն օր արտահանում է մոտավորապես 40 միլիոն խորանարդ մետր գազ։ Այստեղով վառելիքը հասնում է Ավստրիա, Սլովակիա և Հունգարիա և ապահովում է «Գազպրոմ»-ի Եվրոպա մատակարարումների մոտավորապես կեսը։ Եվրոպական երկրները մնացած գազը գնում են Թուրքիայի տարածքով՝ «Թուրքական հոսք» խողովակաշարով։
Ականատեսների վկայությամբ՝ Ուկրաինայի զինված ուժերը գրավել են Սուջայի արևմտյան ծայրամասերը, գրում է Readovka քարոզչական կայքը։ Ուկրաինական զորքերն արդեն գործում են հենց քաղաքում՝ մեկ գիշերվա ընթացքում ռեզերվներ հավաքելուց հետո, և Սուջան կորցնելու շատ լուրջ հավանականություն կա, գրում է «Военный осведомитель»-ը։
Ուկրաինայի Զինված ուժերի հաջորդ թիրախը կարող է լինել Կուրսկի ատոմակայանը, նշել է «Ռոսիա-1»-ի ռազմական թղթակից Ալեքսանդր Սլադկովը։ Ուկրաինական զորքերը կայանից մոտ 45 կմ հեռավորության վրա են, որը Կենտրոնական դաշնային օկրուգի 19 շրջաններին էներգիա է մատակարարում։
Ուկրաինայի Զինված ուժերի անսպասելի խորացումը Կուրսկի շրջանի սահմանի երկայնքով անակնկալի է բերել ռուսական ռազմական ղեկավարությանը. չորեքշաբթի առավոտվա դրությամբ շրջանի 11 բնակավայրերում կորցրել է վերահսկողությունը։
Նախագահ Վլադիմիր Պուտինը արտակարգ խորհրդակցություն է անցկացրել կառավարության անդամների և անվտանգության ուժերի ղեկավարների հետ, որից հետո Կիևին մեղադրել է «սադրանքի» և բնակելի շենքերի վրա հարձակումների մեջ, գրում է Moscow Times-ը։
