ՀԱՄԱՍ-ի բարձրաստիճան անդամ Նաել Սահելը, որը, իսրայելական բանակի հավաստիացմամբ, «ղեկավարում էր հարձակումներն Արեւմտյան ափին», սպանվել է վերջերս տեղի ունեցած ավիահարվածից, տեղեկացրել է Իսրայելի Պաշտպանության բանակը (ՑԱԽԱԼ)։
Նրա տեղեկացմամբ՝ Սահելը հարձակման է ենթարկվել հուլիսի 24-ին, իսկ մի քանի օր անց տեղեկություն է ստացվել, որ նա սպանվել է։
ՑԱԽԱԼ-ի տվյալներով՝ Սահելը ավելի քան տասը տարի եղել է ՀԱՄԱՍ-ի կենտրոնակայանի անդամ Արեւմտյան ափին։
Իսրայելական բանակը հավաստիացնում է, որ Սահելը հանցակից է եղել ահաբեկչական կազմակերպության ֆինանսավորմանն ու զենքի մատակարարմանն Արեւմտյան ափին։
Սահելն առաջին անգամ Իսրայելի կողմից ձերբակալվել է 2003թ. եւ դատապարտվել ցմահ բանտարկության Իսրայելում մահապարտի մասնակցությամբ ահաբեկչության կազմակերպման համար։ Հետո նա ազատ է արձակվել եւ արտաքսվել Գազա 2011թ. գործարքի շրջանակում, ըստ որի՝ Իսրայելը 1 027 պաղեստինցու փոխանակել է գերյալ զինվոր Գիլադ Շալիթի հետ։
