Ադրբեջանի ԿԸՀ-ում ցինիկաբար հայտարարել են, որ Լեռնային Ղարաբաղի հայերը «կարող են մասնակցել» գալիք խորհրդարանական ընտրություններին։
«Ընտրատեղամաս է ստեղծվել նաեւ Խանքենդի (Ադրբեջանում համառորեն այդպես են անվանում Լեռնային Ղարաբաղի մայրաքաղաք Ստեփանակերտը) քաղաքում։ Մենք այնտեղ ստեղծել ենք հիանալի ընտրատեղամասեր։ Տարբերություն չենք դնում, հայկական ծագում ունեցող մեր քաղաքացիները, որոնք ապրում են ազատագրված տարածքներում, կարող են մասնակցել ընտրություններին»,- ինչպես տեղեկացրել է APA-ն, այս մասին ասել է ԿԸՀ նախագահ Մազահիր Փանահովը։
Ինչն է լռության մատնել ադրբեջանական ԿԸՀ-ն, այն, որ այստեղ «հայկական ծագում ունեցող քաղաքացիներ» չկան։ Ադրբեջանի կողմից 2023թ. սեպտեմբերին Լեռնային Ղարաբաղի օկուպացումից հետո ամբողջ բնակչությունը հեռացել է այստեղից։ Միայն Ստեփանակերտում մնացել է մոտ տասը հայ՝ շատ հիվանդ եւ տարեց մարդիկ, որոնք չեն կարողացել հեռանալ։
Այսպիսով, նման ցինիկ եւ լկտի ստով ադրբեջանցի պաշտոնյան փորձում է աղավաղված տպավորություն ստեղծել միջազգային դիտորդների համար։
