Անկանխիկ գործարքների դեպքում թոշակառուները և նպաստառուները 10 տոկոսի փոխարեն այսուհետ կունենան 12 տոկոսի հետվճար։ Այս մասին այսօր ՀՀ կառավարության հերթական նիստի ժամանակ ասաց ՀՀ աշխատանքի և սոցիալական հարցերի նախարար Նարեկ Մկրտչյանը։

Փոփոխվում է նաև առավելագույն հետվճարի չափը` 5000 դրամից դառնալով 6000 դրամ. «Այս տարվա հուլիսի տվյալներով` այս ծրագրից արդեն իսկ օգտվում է 240 հազար շահառու, որոնց ծրագրից մեկնարկից` 2022 թ. հուլիսի 1-ից մինչև այս պահը տրամադրվել է շուրջ 9 մլրդ դրամ հետվճար»։

Նախարարի խոսքով՝ թշակառուներն ու նպաստառուները, հուլիսի տվյալներով, շուրջ 119 մլրդ դրամի անկանխիկ գործարք են արել։

Նա հիշեցրեց, որ այս պահին ՀՀ–ում 540 հազար թոշակառու բանկային քարտով է ստանում իր կենսաթոշակը. ծրագրի մեկնարկին նրաց թիվն ընդամենը 300 հազար էր։